15 Nov 2017, 20:49
އެތުލެޓިކްސް އެސޯސިއޭޝަން އޮފް މޯލްޑިވްސްގެ ކުރީގެ ރައީސް މައިޒާން އަލިމަނިކަށް (އަލިބެ) އިންޓަނޭޝަނަލް އެސޯސިއޭޝަން އޮފް އެތުލެޓިކްސް ފެޑެރޭޝަން (އައިއޭއޭއެފް)ގެ އެވޯޑު ލިބުމުން، ދިރާގުން އެކަން މިއަދު ފާހަގަކޮށްފި އެވެ.
ދިރާގު މައި އޮފީހުގައި މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން އަލިބެ ވިދާޅުވީ ދިރާގަކީ އަބަދުވެސް "ހެޕަނިން" ކަންތައްތަކަށް ވަރަށް އިސްކަންދޭ ކުންފުންޏެއް ކަމަށާއި އެތްލެޓިކްސް ފުޅާ ކުރުމަށް ވެސް ދިރާގުން ވަރަށް މަސައްކަތް ކުރައްވާ ކަމަށެވެ.
"މި ފަދަ އިންޓަނޭޝަނަލް އެވޯޑެއް ލިބުމަކީ ފަހުރުވެރިވާ ކަމެއް. ވަރަށް އުފާވި އެ ވަގުތު ކޮޅު. ރާއްޖެ އަށް ވެސް ލިބުނު ފަހުރެއް މިއީ. އެތުލެޓިކްސް އަށް އެންމެ ބޮޑު އެހީއެއް ކުރިން ވެސް ދީފައި ވަނީ ދިރާގުން. އެންމެ ފުރަތަމަ ދިރާގުން ދިނީ ތިން ޓޯކީ. އެވެސްވެގެން ދިޔައީ ވަރަށް މުހިންމު އެއްޗަކަށް،" އަލިބެ ވިދާޅުވިއެވެ.
މައިޒާން އަލިމަނިކު ރާއްޖޭގެ އެތްލެޓިކްސް އަށް ހިދުމަތް ކުރަން ފެއްޓެވީ 1986 ވަނަ އަހަރުގަ އެވެ. މިހާރު ވެސް އޭނާ އަންނަނީ އެތްލެޓިކްސް އަށް އެހީތެރިކަން ފޯރުކޮށްދެމުންނެވެ.