16 Nov 2017, 12:10
ސަންއާ (ނޮވެމްބަރު 16): ބަލިތަކުގެ ސަބަބުންނާއި ބަނޑުހައި ހޫނުކަމުގެ ސަބަބުން މިއަހަރު ތެރޭ ޔަމަނުން 50،000 އަށް ވުރެ ގިނަ ކުޑަކުދިން މަރުވުން އެކަށީގެންވާ ކަމަށް ކުޑަކުދިންގެ ހައްގުތަކަށް މަސައްކަތް ކުރާ ޖަމްއިއްޔާއެއް ކަމަށްވާ ސޭވް ދި ޗިލްޑްރެން އިން ބުނެފި އެވެ.
އެޖަމްއިއްޔާ އިން ބުނި ގޮތުގައި ހަލުވިކަމާ އެކު ކޮލެރާ ފެތުރެމުންދާ ޔަމަނުގައި ކޮންމެ ދުވަހަކު 130 ކުޑަކުދިން މަރުވާ ކަމަށް ލަފާ ކުރެވެ އެވެ. އަދި ކާނާ ނުލިބުމުގެ ނަތީޖާއެއްގެ ގޮތުން ހަށިގަނޑަށް ބޭނުންވާ ވަރަށް ނިއުޓްރިއެންޓްސް ނުލިބުމުގެ ސަބަބުން މި އަހަރު އެގައުމުގެ 400،000 ކުޑަކުދިންނަށް ފަރުވާ ދޭން ޖެހޭނެ ކަމަށް ވެސް އެޖަމްއިއްޔާއިން ގަބޫލު ކުރެ އެވެ.
ސޭވް ދި ޗިލްޑްރެންއިން އެއަދަދުތައް ލަފާކޮށްފައި ވަނީ ސައުދީ އަރަބިއާއިން މިމަހު ޔަމަނުގެ ބޯޑަރުތައް ބަންދު ކުރުމުގެ ކުރިންނެވެ. އަދި އެފިޔަވަޅުގެ ސަބަބުން ޔަމަނުގައި ކާނާ ލިބުން އިތުރަށް ދަތިވެ، ބޭސް ފަރުވާ ނުލިބުމުގެ ސަބަބުން މަރުވާ ކުޑަކުދިންގެ އަދަދު ކުރިން ހީކުރި ވަރަށް ވުރެ އިތުރު ވާނެ ކަމަށް އެޖަމްއިއްޔާއިން ބުންޏެވެ.
މީގެ އިތުރުން، ސައުދީގެ ފިއްތުންތަކުގެ ސަބަބުން ޔަމަނުގައި ކާނާ އާއި ތެލުގެ އަގު ބޮޑުވެ، ގައުމުގެ އެކި ސަރަހައްދުތަކަށް އެއްގަމުން އެހީ ފޯރުކޮށްދިނުމަށް ވެސް ހުރަސްއެޅިފައިވާ ކަމަށް ސޭވް ދި ޗިލްޑްރެއިން ބުންޏެވެ.
ސައުދީ އަރަބިއާއިން ޔަމަނުގެ ބޯޑަރުތައް ބަންދު ކުރީ އެގައުމުން ރިޔާޟަށް އަމާޒުކޮށް މިސައިލެއް ފޮނުވާލުމާ ގުޅިގެންނެވެ. ސައުދީ ވައިގެ ސިފައިން ނާކާމިޔާބުކޮށްފައިވާ އެހަމަލާއަކީ ހޫޘީ ހަނގުރާމަވެރިން ދިން ހަމަލާއެއް ކަމަށް އެގައުމުން ތުހުމަތު ކުރެ އެވެ. (އިންޑިޕެންޑެންޓް)