24 Nov 2017, 11:07
މިއަހަރު ދިވެހި ފިލްމު ސިނަމާއަށް އައި އެންމެ ކާމިޔާބު އެއް ފިލްމު "ނޯޓީ 40"ގެ ދެ ވަނަ ބައެއް އިއުލާނުކޮށް ފިލްމުގެ މަސައްކަތް ފެށުމަށް މިހާރު މިވަނީ ތައްޔާރުވެފައެވެ.
"ނޯޓީ 40"ގެ ދެވަނަބައި ފޯޓީ ޕްލަސް އަކީ ބޮޑު ކާސްޓަކާއެކު ފެނިގެންދާނެ ފިލްމެކެވެ. މި ފިލްމުގެ ކާސްޓުންގެ ގޮތުގައި 18 ތަރިއަކު ފެނިގެންދާނެއެވެ.
"40 ޕްލަސް" ވެސް ޕްރޮޑިއުސް ކުރަނީ، ނޯޓީ 40ގެ ކާމިޔާބު ޕްރޮޑިއުސަރު އިސްމާއީލް ޝަފީގެވެ. މި ފިލްމުވެސް ޑައިރެކްޓް ކުރާނީ މަޝްހޫރު ފިލްމީ ތަރި އަދި ޑައިރެކްޓަރު ޔޫސުފް ޝަފީއު (ޔޫއްޕެ)އެވެ.
ޔޫއްޕެގެ އަމިއްލަ ސްކްރީން ޕްލޭއަކަށް ތައްޔާރުކުރާ "40+"ގައި ވެސް މެއިން ކާސްޓުންގެ ގޮތުގައި ފެނިގެން ދާނީ، ނޯޓީ40ގެ ވެސް ލީޑުން ފެނިގެން ދިޔަ، ޔޫއްޕެ، އަހްމަދު ސައީދު، މުހައްމަދު މަނިކު އަދި އަލީ ސީޒަން އެވެ.
މީގެ އިތުރުން، ނޯޓީ40ގެ ކުޅަދާނަ ބަޠަލާ ފާތިމަތު އާޒިފާ (އަޒޫ)، ޝީލާ ނަޖީބު، އަލީ އާޒިމް (ދޮންއައްޔަ)، މުޙައްމަދު ފައިސަލް އަދި ޔޫއްޕެގެ "ދެވަންސޫރަ"އިން ފިލްމީ ދާއިރާއަށް މުޅިން އަލަށް ތައާރަފްވާ މަރިޔަމް ޝިފާ ވެސް "40+"ގައި ހަރަކާތްތެރިވާނެއެވެ.
ފޯޓީ ޕްލަސް އާ ގުޅޭ އެންމެ ފަހުގެ މައުލޫމާތު "ސަން" އަށް ދެމުން ޔޫއްޕެ ބުނީ ފިލްމުގެ ޝޫޓިން ފަށަން މިހާރު ތައްޔާރުވެފައިވާ ކަމަށެވެ. "އަންނަ މަހު ޕޯޓީ ޕްލަސްގެ ޝޫޓިން އަށް ފުރާނެ."
ފޯޓީ ޕްލަސް އާއެކު "ކަޅަކި"ގެ ޝޫޓިންވެސް ކުރިއަށްދާނެ ކަމަށް ޔޫއްޕެ ބުންޏެވެ. ކަޅަކި އަކީ ލޯބީގެ ފިލްމެކެވެ. މި ފިލްމުގައި ފެނިގެންދާނީ ދެމަފިރިއެއްގެ ދިރިއުޅުގެ ވާހަކަ ކަމަށާއި މިއީ ދިވެހި މުޖްތަމައާ ގުޅޭނެ ފިލްމެއް ކަމަށް ޔޫއްޕެ ބުންޏެވެ. ކަޅަކިގެ ކާސްޓުންގެ ގޮތުގައި ފެންނާނީ ފާތުމަތު އާޒިފާ (އަޒޫ)، މުހައްމަދު ފައިސަލް އަދި އަހުމަދު ޝާހް އެވެ.
"ފޯޓީ ޕްލަސް" އަދި "ކަޅަކި" ގެ ޝޫޓިން ކުރިއަށްދާނީ ތ. ބުރުނީގައެވެ.
"ފިލްމު އަޅުވާނެ ތާރީޚް ބުނަން އެނގޭނީ ޝޫޓިން ނިމުނީމަ. ޖެނުއަރީގަ ނިމޭނެ ހެން ހީވަނީ،" ޔޫއްޕެ ބުނީ "ކަޅަކި" އަދި ފޯޓީ ޕްލަސްގެ ޝޫޓިން އަށްފަހު "ނަފްސު" އަދި "ހައްޔަރު" ގެ މަސައްކަތް ފަށާނެ ކަމަށެވެ.
"އެ ދެފިލްމުގެ މަސައްކަތް މާޗް ހިސާބުގަ ފެށޭނެ. ކާސްޓުން ހަމަޖެހިފަ މިހާރު އޮތީ. މިހާރު ކުރަނީ ސައިޑް ކާސްޓުން ހޯދުމުގެ މަސައްކަތް،" ނަފްސު އަދި ހައްޔަރުގެ ޝޫޓިން ކުރިއަށްދާނީ އދ. މާމިގިލީގައެވެ. ނަފްސު، ހައްޔަރު، ކަޅަކި އަދި ފޯޓީ ޕްލަސް އަކީ އަންނަ އަހަރު ސްކްރީނަށް އަންނާނެއެވެ.