28 Nov 2017, 18:07
ކްލަބު ގްރީން ސްޓްރީޓްސްގެ ކޯޗުކަމުގެ މަގާމު އަދާކުރި ސޮބާހު މުހައްމަދު (ސޮބާ)އަށް ތައުރީފުކޮށް، އެ ކްލަބުން އޭނާއަށް ޝުކުރު އަދާކޮށްފި އެވެ.
ގްރީނާއި ކޯޗު ސޮބާއާ ދެމެދު އެއްބަސްވުމަކަށް ގޮސް، ސޮބާއާ އެކު އެ ކްލަބުން ހަދާފައިވާ ކޮންޓްރެކްޓް ވަނީ އުވާލައިފަ އެވެ. ސޮބާގެ ކޮންޓްރެކްޓްގެ މުއްދަތު ހަމަވާން އޮތީ މިސީޒަނުގެ ނިޔަލަށެވެ. ގްރީނަށް މިސީޒަނުގައި ބާކީ އޮތީ އެފްއޭ ކަޕެވެ.
ގްރީންގެ ރައީސް އަހްމަދު ޝަޒީން 'ސަން'އާ ވަހަކަދައްކަވަމުން ވިދާޅުވީ، އެ ކްލަބު ދޫކޮށްލަން ސޮބާ ބޭނުންވާތީ މެނޭޖްމަންޓުން ސޮބާގެ ކޮންޓްރެކްޓް އުވާލާފައިވާ ކަމަށާއި ގްރީނާ އެކު ސޮބާ ވަރަށް ރަނގަޅު މަސައްކަތެއް ކޮށްފައިވާ ކަމަށެވެ.
"ސޮބާގެ މައްސަލައެއް އޮވެގެންނެއް ނޫން ކޮންޓްރެކްޓް އުވާލީ. ސޮބާ އާއި އަޅުގަނޑުމެން މަޝްވަރާކުރިން. ސޮބާ ބޭނުންވީ ކޯޗުކަމުގެ މަގާމު ދޫކޮށްލަން. އެހެންވެގެން މެނޭޖްމަންޓުން ނިންމީ އޭނާގެ ކޮންޓްރެކްޓް އުވާލަން. ފުރަތަމަ އަހަރާ ބަލާފައި އަޅުގަނޑުމެންނަށް މިސީޒަނުގައި ހޯދުނީ ވަރަށް ރަނގަޅު ކާމިޔާބީތަކެއް. އަލަށް ފުރަތަމަ ޑިވިޝަންގައި ވާދަކުރި ޓީމަކަށް ބަލާއިރު ހޯދުނީ ވަރަށް ރަނގަޅު ނަތީޖާތަކެއް. މިސީޒަނުގައި ގްރީނުން ހޯދި ކާމިޔާބީތަކުގެ ފަހަތުގައި އެންމެ އިސް ދައުރެއް އަދާކުރި އެއް ފަރާތަކީ ކޯޗު ސޮބާ. އަޅުގަނޑުމެން ސޮބާއަށް ޝުކުރު އަދާކުރަން،" އޭނާ ވިދާޅުވި އެވެ.
ގްރީންގެ ރައީސް ވިދާޅުވީ، ކުރިއަށް އޮތް އެފްއޭ ކަޕްގައި ވަގުތީ ގޮތުން ކްލަބާ ހަވާލުވާ ކޯޗެއް ވަރަށް އަވަހަށް އިއުލާން ކުރާނެ ކަމަށާއި އަންނަ ސީޒަނުގައި ވެސް ކްލަބުން ރަނގަޅު ކޯޗެއް ފެނިގެންދާނެ ކަމަށެވެ. އަދި އެ ކްލަބުން މަސައްކަތް ކުރާނީ ދިވެހި ކޯޗެއް ހޯދުމަށް ކަމަށް ވެސް އޭނާ ވިދާޅުވި އެވެ.
ފުރަތަމަ ޑިވިޝަނަށް ޕްރޮމޯޓްވުމަށް ފަހު، ގްރީނުން ވަނީ މިއަހަރުގެ މާލޭ ލީގުގައި ވަރަށް ރަނގަޅު ކާމިޔާބެއް ހޯދައިފަ އެވެ. ނިއު ރޭޑިއަންޓް ސްޕޯޓްސް ކްލަބާއި ޓީސީ ސްޕޯޓްސް ކްލަބު ވައްޓާލުމަށް ފަހު ގްރީނުން މާލޭ ލީގުގެ ދެ ވަނަ ހޯދި ނަމަވެސް، ދިވެހި ޕްރިމިއާ ލީގުގައި އެ ކްލަބަށް އެންމެ އެދެވޭ ނަތީޖާތަކެއް ހޯދިފައެއް ނުވެ އެވެ. ގްރީނުން ޕްރިމިއާ ލީގު ނިންމާލީ ފަސް ވަނައިގަ އެވެ.