30 Nov 2017, 15:00
ސްރީލަންކާ އަށް މިހާރު އަރައިގެން އުޅޭ ކޮޅިގަނޑުގެ ސަބަބުން ގެއްލުން ލިބެ އާއިލާތަކަށް ފައިސާގެ އެހީ ދިނުމަށް އެގައުމުގެ ސަރުކާރުން ނިންމައިފިއެވެ.
މިއަދު ހެނދުނު ބޭއްވި ނޫސްވެރިންގެ ބައްދަލުވުމެއްގައި ސްރީލަންކާގެ ޑިޒާސްޓާ މެނޭޖްމެންޓް މިނިސްޓަރު އަނޫރާ ޕްރިޔަދަރުޝަނާ ވިދާޅުވީ ވިއްސާރައިގެ ސަބަބުން ގެއްލުން ލިބޭ ކޮންމެ އާއިލާއަކަށް ސަރުކާރުން 10،000 ރުފީސްގެ އެހީ ދޭނެ ކަމަށެވެ.
ކޮޅިގަނޑު ތޫފާނަކަށް ބަދަލުވެ، އިންޑިއާގެ ހުޅަނގު އުތުރަށް މިހާރު ދަނީ ދަތުރު ކުރަމުންނެވެ.
ލަންކާއަށް ކުރަމުންދާ ވިއްސާރާގައި މިއަދު 150 މިލިިމީޓަރުގެ ވާރޭ ވެހޭނެ ކަމަށް ވަނީ ލަފާކޮށްފައެވެ. ވިއްސާރައިގެ ސަބަބުން އާދަޔާ ޚިލާފަށް ވައިގަދަވެ ބޯކޮށް ވާރޭވެހި، ހަތަރު މީހުން މަރުވެ 23 މަސްވެރިން ވަނީ ގެއްލިފައެވެ.
ކުރިއަށް އޮތް 24 ގަޑިއިރުވެސް ލަންކާއަށް ވިއްސާރަކުރާނެ ކަމަށާއި އައްސޭރިފަށަށް 100 މޭލު ބާރުމިނުގައި ވައިޖެހޭނެ ކަމަށް ވަނީ ލަފާކޮށްފައެވެ.