06 Dec 2017, 13:30
މޯލްޑިވިއަންގެ އެތެރޭގެ އުދުހުންތައް އިތުރުކުރުމަށް އިތުރު ދެ ސީޕްލޭނެއް މިއަދު ރާއްޖެ އަންނާނެ ކަމަށް މޯލްޑިވިއަންއިން ބުނެފިއެވެ.
ސަން އަން މައުލޫމާތު ދެއްވަމުން އައިލެންޑް އޭވިއޭޝަންގެ މެނޭޖިން ޑިރެކްޓަރު އަބްދުލް ހާރިސް ވިދާޅުވީ، ސްވިޒަލޭންޑުން ފުރައިގެން އަންނަ ޓުއިން އޮޓާގެ ދެ އެއާ ކްރާފްޓް މިއަދު ހަވީރު ރާއްޖެ އަންނާނެ ކަމަށެވެ.
މިއަދު ރާއްޖެ އަންނަ ދެ ސީ ޕްލޭންގެ އިތުރުން މި މަހުގެ އަށްވަނަ ދުވަހު ކެނެޑާއިން ފުރައިގެން މި މަހުގެ 20 ވަނަ ދުވަހުވެސް އިތުރު އެއާ ކްރާފްޓެއް އަންނާނެ ކަމަށް ހާރިސް ވިދާޅުވިއެވެ. އަދި މި މަހުގެ 29 ވަނަ ދުވަހުގައިވެސް އިތުރު އެއާކްރާފްޓެއް ގެންނާނެކަމަށްވެސް ހާރިސް ވިދާޅުވިއެވެ.
ހާރިސް ވިދާޅުވީ، ސީ ޕްލޭންގެ އިތުރުން އަންނަ ޖެނުއަރީ މަހުގެ 15 ވަނަދުވަހު ޑޭޝް އެއިޓް މަރުކާގެ އެއާކްރާފްޓެއްވެސް ގެނައުމުގެ މަސައްކަތް ކުރަމުންދާކަމަށެވެ.
ރާއްޖޭގެ ފަތުރުވެރިކަމުގެ ދާއިރާ އިތުރަށް ފުޅާވެ ރިސޯޓުތަށް ގިނަވާން ފެށުމުން ރާއްޖެ އަންނަ ފަތުރުވެރިން އެއްތަނުން އަނެއްތަނަށް އުފުލުމުގެ އެންމެ ބޮޑު ޒިންމާއެއް އުފުލަން ޖެހެނީ މޯލްޑިވިއަނުންކަމަށް ގަބޫލު ކުރާ ކަމަށް ހާރިސް ވިދާޅުވިއެވެ.
މޯލްޑިވިއަންގެ ފްލީޓަށް އިތުރުކުރާ ފްލައިޓްތަކުގެ ސަބަބުން ރާއްޖޭގެ އިތުރުވާ ރިސޯޓިތަކާއި ފަތުރުވެރިންނާ އެއްވަރަށް ހިދުމަތްވެސް ފުޅާކުރެވިގެންދާނެ ކަމަށް ހާރިސް ވިދާޅުވިއެވެ.
މޯލްޑިވިއަންގެ ފްލީޓްގައި މިހާރު 20 ފްލައިޓް އޮންނައިރު އެކުންފުނިން އަންނަނީ ގިނަ މަންޒިލްތަކަށް ދަތުރު ކުރަމުންނެވެ.