12 Dec 2017, 16:09
ލ. ކުނަހަންދޫ ބަނދަރު ތެރެއިން ދާ ޖަހައިގެން މުށިމަސް ހިފި މައްސަލައެއް ފިޝަރީޒް މިނިސްޓްރީއަށް ހުށަހެޅުމަށް އެ ރަށު ކައުންސިލުން ނިންމައިފި އެވެ.
ކުނަހަންދޫ ކައުންސިލަރު ސަބްރީ އަބްދުﷲ މިއަދު ސަންއަށް ވިދާޅުވީ އެ މައްސަލަ ކުރިން ފުލުހުންނަށް ހުށަހެޅި ނަމަވެސް ފުލުހުންގެ ފަރާތުން އެއްވެސް ވަރަކަށް އެކަމަށް އެއްބާރުލުން ލިބިފައި ނުވުމުން އެ މައްސަލަ ފިޝަރީޒް މިނިސްޓްރީއަށް ހުށަހަޅަން ނިންމާފައިވާ ކަމަށެވެ.
ސަބްރީ ވިދާޅުވީ ބަލަން ޖެހޭ ކަންތައްތައް ބެލުމަށް ފަހު އެ މައްސަލަ ފިޝަރީޒް މިނިސްޓްރީއަށް ހުށަހަޅާނެ ކަމަށާއި މިއަދު ވެސް އެ މިނިސްޓްރީއަށް ގުޅުމުން ކަމާ ބެހޭ މީހަކާ ދިމާވާ ގޮތެއް ނުވި ކަމަށެވެ.
"އެ މައްސަލަ ހަމަ އެ ދުވަހުން ދުވަހަށް ފުލުހުންނަށް ހުށަހެޅިން. އެމީހުން އެކަމަށް މާ ބޮޑު އެއްބާރުލުމެއް ދީފައެއް ނުވޭ. އެ މީހުން ބުނީ އެކަން ނުކުރަން އެމީހުންނަށް ވެސް އެނގޭނެ ނޫންހޭ،" އޭނާ ވިދާޅުވި އެވެ.
އެ މައްސަލައާ ގުޅިގެން ފުލުހުންގެ މީޑިއާ އޮފިޝަލް ވިދާޅުވީ، ލ. ކުނަހަންދޫ ބަނދަރު ތެރެއިން ދާ ޖަހައިގެން މުށިމަސް ހިފި މައްސަލައެއް ތަހްގީގުކުރަމުން ދާ ކަމަށެވެ. އިތުރު ތަފްސީލެއް ނުދެއްވައެވެ.
ސަބްރީ ވިދާޅުވީ އިއްޔެ ހެނދުނު ކުނަހަންދޫ ދޯންޏަކުން ދާ ޖަހައިގެން މަސް ހިފީ ކައުންސިލުން އެކަން މަނާކޮށް ގެޒެޓްގައި އެ ގަވައިދު އާއްމު ކޮށްފައި ވެސް ވަނިކޮށް ކަމަށާއި އެ ދޯނިން މަސް ހިފި އިރު ވެސް އެކަން ނުކުރަން އެ މީހުން ކައިރީ އެދުނު ކަމަށެވެ.
އޭނާ ވިދާޅުވީ ބަނދަރުން މުށިމަސް ހިފި މައިގަނޑު ސަބަބެއް ކަމަށް މަސްވެރިން ބުނަނީ، މި ދުވަސްވަރަކީ އެންވެރިކަން ދަތި ދުވަސްވަރަކަށް ވުމުން ކަމަށެވެ.