19 Dec 2017, 18:44
މި ސީޒަނުގައި ޓީސީ ސްޕޯޓްސް ކްލަބަށް މޮޅު ކުޅުމެއް ދައްކާފައިވާ އިބްރާހީމް މަހުދީ (ފޭދޫ އިއްބެ) އެ ކުލަބުގައި މަޑުކުރަން ނިންމައި ކޮންޓްރެކްޓު އާކޮށްފިއެވެ.
ޓީސީ މިއަހަރުގެ އުރީދޫ ދިވެހި ޕްރިމިއާ ލީގުގެ ދެވަނަ ހޯދައި އެފްއޭ ކަޕާއި ޕްރެޒިޑެންޓްސް ކަޕުގެ ފައިނަލަށް ދަތުރު ކުރުމުގައި ފޭދޫ އިއްބެ ވަނީ މުހިންމު ދައުރެއް އަދާކޮށްފައެވެ.
އަހަރުގެ އެންމެ މޮޅު ކުޅުންތެރިޔާގެ ތެރޭ ނޮމިނޭޓް ވި ފޭދޫ އިއްބެ ވަނީ ޓީސީ އަށް މި ސީޒަނުގައި މޮޅު ކުޅުމެއް ދައްކައި ގައުމީ ޓީމުން ޖާގަ ހޯދާފައެވެ. އޭނާ ވަނީ މި ސީޒަނުގައި ޓީސީ އަށް 17 ލަނޑު ޖަހައިދީފައެވެ.
ފޭދޫ އިއްބެގެ އިތުރުން މި ސީޒަނުގައި ޓީސީން ވިދާލި އިބްރާހިމް ވަހީދު ހަސަން ވެސް ވަނީ އެ ކުލަބުގައި މަޑުކުރަން ނިންމާފައެވެ. މީގެ އިތުރުން އެ ޓީމުގެ މެދުތެރޭގައި މޮޅު ކުޅުމެއް ދެއްކި މުހައްމަދު އައްޒާމް ވެސް ވަނީ ޓީސީގެ ކޮންޓްރެކްޓް އާ ކޮށްފައެވެ.
އަންނަ އަހަރުގެ އޭއެފްސީ ކަޕަށް ކޮލިފައިވުމާ ގުޅިގެން ޓީސީން ދަނީ ސްކޮޑު ވަރުގަދަ ކުރުމަށް މަސައްކަތް ކުރަމުންނެވެ. އެގޮތުން ޖެނުއަރީ މަހުގެ ތިން ވަނަ ދުވަހު ޕްރެކްޓިސް ފެށުމަށް ހަމަޖެހިފައިވާއިރު ބިދޭސީ ހަތަރު ކުޅުންތެރިން ވެސް އެ ޓީމަށް ގެންނާނެ ކަމަށް އެ ކުލަބުން މައުލޫމާތު ދެއެވެ.
އޭއެފްސީ ކަޕުގައި ޓީސީ އެންމެ ފުރަތަމަ ވާދަކުރަން ޖެހޭނީ ޕްރިލިމިނަރީ ބުރުގަ އެވެ. އެ ބުރުގައި އެ ޓީމު ކުޅޭނީ ބަންގްލަދޭޝްގެ ފެޑެރޭޝަން ކަޕް ޗެމްޕިއަނުންނާ އެވެ. ޕްރިލިމިނަރީ ބުރުގައި ޓީސީގެ ފުރަތަމަ ލެގު ޖެނުއަރީ 23 ގައި އޮންނައިރު ދެ ވަނަ ލެގު އޮންނާނީ ޖެނުއަރީ 30 ގަ އެވެ.