21 Dec 2017, 10:19
ރިއަލިޓީ ޝޯ "ކީޕިން އަޕް ވިތް ދަ ކާޑޭޝަންސް"ގެ ތަރި ކްލޯއީ ކާޑޭޝަން އަށް ދަރިއަކު ލިބެން އުޅޭކަން ޔަގީންކޮށްދީފި އެވެ.
ކާޑޭޝަން، ޖެނާ އާއިލާ އަކީ "މީޑިއާގެ ސަމާލުކަން" ހޯދަން ކޮންމެ ކަމެއްވެސް ކޮށްފާނެ ބައެކެވެ. ކްލޯއީ ބަނޑުބޮޑު ކަމަށް އެންމެ ފުރަތަމަ އަޑު ފެތުރުނީ މި އަހަރުގެ ސެޕްޓެމްބަރުގަ އެވެ. ދައްތަ ކިމް ކާޑޭޝަން އާ އެއްބަނޑު ކޮއްކޮ ކައިލީ ޖެނާ އާ ތިން މީހުންނަށް ދަރިން ލިބެން އުޅޭ ކަމަށް މީޑިއާގައި ދެކެވުނު ވާހަކައަށް ކްލޯއީ އަދި ކައިލީގެ ފަރާތުން ސީދާ ޖަވާބެއް ނުލިބެ އެވެ. ކިމް އަށް ދަރިއަކު ލިބެނީ ސަރަގޭޓް މަންމަ އެއް މެދުވެރިކޮށެވެ.
ކްލޯއީ އަދި ކައިލީ ވަނީ މީގެ ކުރިން ވެސް އެމީހުން ބަނޑުބޮޑުކަމަށް ދެކެވޭ ވާހަކަ އަށް ބާރުދޭ ފަދަ ޕޯސްޓްތައް ސޯޝަލް މީޑިއާގައި ހިއްސާކޮށްފަ އެވެ. އެކަމަކު އެކަމާ ގުޅޭ ސީދާ ޖަވާބެއް އޭރަކު ނުގެ އެވެ.
ކްލޯއީ ބަނޑުބޮޑުކަން ޔަގީންކޮށްދީ އޭނާގެ އިންސްޓަގްރާމްގައި ވަނީ ފޮޓޯ އެއް ހިއްސާކޮށްފަ އެވެ. އަދި އޭނާ ބަނޑުބޮޑުކަމަށް ދެކެވުނު ވާހަކައާ ގުޅިގެން ވަކި އެއްޗެއް ނުބުނީ އެކަން ހަމައެކަނި އާއިލާ އާއި ގާތް ރައްޓެހިންނާ އެކީ ހިއްސާކުރުމަށް ކަމަށާއި ނަމަވެސް ފޭނުންގެ ފަރާތުން ލިބޭ ލޯތްބަށް ޝުކުރު އަދާކުރާ ކަމަށް ކްލޯއީ ވަނީ ބުނެފަ އެވެ.
ކާޑޭޝަން، ޖެނާ އާއިލާގެ ކައިލީ ޖެނާ ބަނޑުބޮޑުކަމަށް ދެކެވޭ ވާހަކަ ޔަގީންކޮށްދޭނެ ދުވަހެއްގެ އިންތިޒާރުގައި ވެސް ގިނަ ބަޔަކު އެބަ ތިއްބެވެ.