26 Dec 2017, 13:49
ރާއްޖެ އާއި އިންޑިއާ އާ ދެމެދު އުފެދިފައިވާ ކަންބޮޑުވުންތަކާމެދު މަޝްވަރާ ކުރުމަށް އިންޑިއާގެ ކަމާބެހޭ ފަރާތްތަކުގެ މައްޗަށް އެކުލެވޭ ވަފުދެއް ރާއްޖެ އައުމަށް ހަމަޖެހިއްޖެ އެވެ.
އިންޑިއާގެ "ޓައިމްސް އޮފް އިންޑިއާ"ގައި ބުނެފައިވާ ގޮތުން ރާއްޖެ އާއި އިންޑިއާ އާ ދެމެދު އުފެދިފައިވާ ކަންބޮޑުވުންތަކާ މެދު މަޝްވަރާކުރުމަށް އަންނަ މަހުގެ ތެރޭ އިންޑިއާގެ ވަފުދެއް ރާއްޖެ އަންނާނެ އެވެ.
ޓައިމްސް އޮފް އިންޑިއާގައި ބުނެފައި ވަނީ އިންޑިއާ އާއި ރާއްޖެ އާ ދެމެދު ކަންބޮޑުވުންތައް އިތުރުވެފައި ވަނީ "ރާއްޖޭގެ ސަރުކާރު ޕްރޮމޯޓުކުރާ ނޫހަކުން" އިންޑިއާއާ ގުޅޭ ގޮތުން ޝާއިއު ކުރި ލިޔުމެއްގެ ފަހުން ކަމަށެވެ. ނަމަވެސް އެކަމާ ގުޅޭ ގޮތުން ރައީސް ޔާމީން ވާހަކަ ދައްކަވާފައިވާ ކަމަށާއި އިންޑިއާ އަކީ ރާއްޖޭގެ އެންމެ ގާތް ގައުމު ކަމަށް ރައީސް ޔާމީން ވިދާޅުވެފައިވާ ކަމަށް ވެސް ޓައިމްސް އޮފް އިންޑިއާގައި ބުނެފައިވެ އެވެ.
ނ. ވެލިދޫގައި ބޭއްވި ޖަލްސާއެއްގައި ވާހަކަ ދައްކަވަމުން ރައީސް ޔާމީން ވިދާޅުވީ "އަޅުގަނޑުމެން ޗައިނާއާ އެކު މިނިވަން ވިޔަފާރީގެ އެގްރީމެންޓެއް ކުރެވިގެން، އެކަމުގައި އިންޑިއާގެ ބައެއް އަމިއްލަ މީހުންގެ، ޖާނަލިސްޓުންގެ ޚިޔާލު ތަފާތުވެގެންދާ ދިޔުމަށް، ދައްކާ ވާހަކަ އަށް އަޅުގަނޑުމެންގެ ނޫސްވެރިން ނުޖެހޭ ރައްދުދޭކަށް. އެއީ ވަރަށް ދެރަކަމެއް،" ކަމަށެވެ.
މީގެ އިތުރުން "އަޅުގަނޑުމެންނާ އެންމެ ގާތް ގައުމަކީ އިންޑިއާ. އެއީ ޒަމާނުއްސުރެ މިކަން އޮތްގޮތް. އެހެންވީމަ އަޅުގަނޑުމެން އެއްގޮތަށް ވެސް ކޮށްގެން ނުވާނެ ކަމަކީ، އިންޑިއާ އާއި އިންޑިއާގެ ވެރިންނާ ސިޔާސީ ބޭފުޅުންނަށް ރައްދުވާ ގޮތަށް ބަދުބަސްބުނުމަކީ އަޅުގަނޑުމެން ކޮށްގެންވާނެ ކަމެއް ނޫން،" ކަމަށް ވެސް ރައީސް ވިދާޅުވި އެވެ.
އިންޑިއާ ސަރުކާރުގެ ވަފުދެއް އަންނަ މަހު ރާއްޖެ ޒިޔާރަތް ކުރުމާ ގުޅޭ ގޮތުން ދިވެހި ސަރުކާރުން ވެސް އަދި އިންޑިއާ ސަރުކާރުން ވެސް ވަކި އެއްޗެއް ބުނެފައެއް ނުވެ އެވެ.