13 Jan 2018, 18:18
ޕާކިސްތާނުގެ ކަސޫރުގައި އަނިޔާވެރިކޮށް މަރާލާފައި އޮއްވާ ފެނުނު އުމުރުން ހަތް އަހަރުގެ ޒައިނަބު އަމީން މަރާލި ކަމަށް ތުހުމަތު ކުރެވޭ މީހާގެ އާ ސީސީޓީވީ ފޫޓޭޖެއް ޕާކިސްތަނުގެ ފުލުހުން އާންމުކޮށްފިއެވެ.
ޒައިނަބު ގެއްލުނީ މި މަހުގެ ހަތަރު ވަނަ ދުވަހުއެވެ. އޭނާ ގެއްލުނު އިރު މައިންބަފައިން ވީ އުމްރާގެ އަޅުކަމަށް މައްކާ އަށް ގޮހެވެ. ޒައިނަބު ދިރިއުޅެމުން ދިޔައީ މަންމަ ފަރާތު ބޮޑުދައިތައެއްގެ ކައިރީގައެވެ. ޒައިނަބު ގެއްލުނީ ގުރުއާން ކިޔެވުމަށްފަހު އެނބުރި ގެއަށް ދިޔަ މަގުމަތީއެވެ.
ފުލުހުން އާންމުކޮށްފައިވާ ފޫޓޭޖުން ފެންނަ ގޮތުގައި އެ މީހާ ހިނގަމުން ދަނީ ޒައިނަބު ދިރިއުޅޭ ގެއާއި ކައިރި ހިސާބެއްގައެވެ. ލައިގެން ހުރީއަޅި ކުލައިގެ ސަލްވާރު ހެދުމެކެވެ. ބޮލުގައި ގަދަ ކުލައެއްގެ ތޮތްޕެއް އަޅާފައި ހުރި އިރު މުށި ކުލައިގެ ޖެކެޓެއް ލައިގެން ހުރިކަމަށް ބެލެވެއެވެ.
ފުލުހުން ބުނީ ޒައިނަބުގެ މަރުގެ ތުހުމަތު ކުރެވެނީ އެ ފޫޓޭޖުން ފެންނަ މީހާއަށް ކަމަށެވެ.
މީގެ ކުރިން ފުލުހުންނަށް ލިބުނު ސީސީޓީވީ ފޫޓޭޖުތަކަށްވުރެ މިއަދު އާންމު ކުރި ފޫޓޭޖު ސާފު ކަމަށާއި އެމީހާ ހޯދުމަށް މިއިީ ލިބުނު ކުރިއެރުމެއް ކަމަށް ފުލުހުން ބުނެއެވެ.
ޕާކިސްތާނުގެ ފުލުހުން އިއްޔެ ބުނީ ޒައިނަބުގެ ގައިން ފެނުނު ޑީއެންއޭ އޭ އާ، ކުޑަކުދިން ރޭޕްކޮށް މަރާ ކަމުގެ ތުހުމަތު ކުރެވޭ މީހާގެ ޑީއެންއޭ އާ ދިމާވާ ކަމަށެވެ.
ޒައިނަބު މަރާލި ކަމުގެ ތުހުމަތު ކުރެވޭ މީހާ ހައްޔަރުކުރެވޭވަރުގެ މައުލޫމާތު ފުލުހުންނަށް ފޯރުކޮށްދޭ މީހަކަށް ޕަންޖާބުގެ ކެބިނެޓުން ވަނީ 10 މިލިއަން ރުޕީސްގެ ފައިސާގެ އިނާމެއް ހުށަހަޅައިފައެވެ.
ޒައިނަބުގެ މަރާ ގުޅިގެން ޕާކިސްތާނު ހަލަބޮލިވެ، ޒައިނަބަށް އިންސާފު ހޯދައިދިނުމަށް ގޮވާލާ މުޒާހަރާކުރަނިކޮށް ފުލުހުން ބަޑިޖެހުމުގެ ސަބަބުން މުޒާހަރާގައި ބައިވެރިވި ދެ މީހަކު ވަނީ މަރުވެފައެވެ. އެ ދެމީހުންގެ އާއިލާއަށް ތިން މިލިއަން ރުޕީސް ދިނުމަށްވެސް ކެބިނެޓުން ވަނީ ނިންމައިފައެވެ. މީގެ އިތުރުން އެ ދެމީހުންގެ އާއިލާގެ ކޮންމެ މެންބަރަކަށް ސަރުކާރު ވަޒީފާއެއް ހަމަޖައްސައިދިނުމަށްވެސް ކެބިނެޓުން ވަނީ ނިންމައިފައެވެ.
ޒައިނަބަށް އިންސާފު ހޯދައިދިނުމަށް ގޮވާލާ މުޒާހަރާ ކުރާ މީހުން އާންމުންގެ މުދަލަށާއި އިމާރާތްތަކަށް ގެއްލުން ދެމުންދާތީ އެކަން އެގޮތަށް ނުކުރުމަށް ޒައިނަބުގެ އާއިލާ އިން ވަނީ ގޮވާލައިފައެވެ.
ރޭޕްކޮށް އަނިޔާކުރުމަށްފަހު މަރާލާފައި އޮއްވާ ފެނުނު މައުސޫމު ޒައިނަބަށް އިންސާފު ހޯދައި ދިނުމަށް ޕާކިސްތާނުގެ އިތުރުން ދުނިޔޭގެ އެކި ކަންކޮޅުތަކުގައި ތަފާތު މީޑިއަމްތަކުގައި ދަނީ އަޑު އުފުލަމުންނެވެ.