15 Jan 2018, 16:02
ރާއްޖޭން ބޭރުގައި ކުރާ ހަނގުރާމަތަކުގައި ބައިވެރިވެ، ހަނގުރާމަ ނިމުމުން ރާއްޖެ އައި ނަމަވެސް ގާނޫނީ އަދަބު ދޭނެ ކަމަށް ޑިފެންސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
ބައެއް ހިސާބުތަކުގައި ކުރާ ހަނގުރާމަ ނިމި ބައެއް މީހުން ވަނީ އެނބުރި ގައުމަށް އަންނަން ފަށައިފަ އެވެ. ރާއްޖެ އިން ހަނގުރާމައަށް ދިޔަ މީހަކު އައިތޯ ނޫސްވެރިއަކު ދެންނެވުމުން މިނިސްޓަރު ޝަރީފް ވިދާޅުވީ ބައެއް މީހުން އަންނަކަން ފާހަގަ ކުރެވިފައިވާ ކަމަށެވެ.
އެގޮތުން މިހާތަނަށް ތިން މީހެއްގެ މައްޗަށް ދައުވާކޮށް، ޝަރީއަތް ކުރިއަށް ދާ ކަމަށް އާދަމް ޝަރީފް ވިދާޅުވި އެވެ.
"އަޅުގަނޑުމެން މީޑިއާތަކުގެ ފަރާތުން އަދި އާއިލާތަކުގެ ފަރާތުންނާއި އާންމުންގެ ފަރާތުން އެދެނީ ރާއްޖޭން ބޭރުގައި ހަނގުރާމާގައި ނުވަތަ ވީތަނެއް ނޭނގި އަންނަ މީހެއްގެ މައުލޫމާތު އަޅުގަނޑުމެންނާ ހިއްސާ ކުރެއްވުން،" ޑިފެންސް މިނިސްޓަރު ވިދާޅުވި އެވެ.
ހަނގުރާމައަށް ދިއުމަށް ފަހު އަންނަން ބޭނުންވާ މީހުން ރާއްޖެ އައުމަށް މަގުފަހިކޮށްދޭ ކަމަށް އާދަމް ޝަރީފް ވިދާޅުވި އެވެ. އެހެން ނަމަވެސް ގާނޫނުން ލިބެން ޖެހޭ އަދަބު ދޭނެ ކަމަށް ވެސް ވިދާޅުވި އެވެ.
"ގަބޫލު ކުރަން ޖެހޭ ހަގީގަތަކީ އޭން ކޮންމެ މީހަކު ރާއްޖޭގައި ހެދިފައި ހުރި ގާނޫނުތަކާ ހިލާފަށް ހުރި ބައެއް ކަންތައް ތަކުގައި ބައިވެރިވެފައި ހުރި ފަރާތްތައް ކަމަށް ވާތީވެ، ގާނޫނުތަކުގައި އޮންނަ ގޮތުގެ މަތިން އަމަލު ކުރެވެމުން ދާނެ،" އާދަމް ޝަރީފު ވިދާޅުވި އެވެ.
ރާއްޖެ އިން ބޭރުގައި ހިނގާ ހަނގުރާމަތަކަށް ދިއުމަކީ ކުށެއް ކަމަށް ޓެރަރިޒަމް މަނާ ކުރުމުގެ ގާނޫނުގައި ވަނީ ކަނޑައަޅައިފަ އެވެ.
ޓެރަރިޒަމް މަނާކުރުމުގެ ގާނުނުގެ 16 ވަނަ މާއްދާގެ (ހ)
- އެހެން ގޮތަކަށް ސާބިތުނުވާހާ ހިނދަކު، ދިވެހި ސަރުކާރުން ހުއްދަދޭ ހާލަތްތަކުގައި މެނުވީ، އަންނަނިވި ކަންތައްތަކުގެ ތެރެއިން ކަމެއް ކުރުމަކީ ކުށެކެވެ.
- ރާއްޖެ އިން ބޭރުގައި ހިނގާ ހަނގުރާމައެއްގައި ބައިވެރިވުމަށް ދިވެހިރާއްޖެ ދޫކޮށް ދިއުން.
އެދައުވާ ސާބިތު ވެއްޖެ ނަމަ 17 އަހަރާއި 20 އަހަރާ ދެމެދުގެ މުއްދަތަކަށް ޖަލަށް ލެވޭނޭ ކަމަށް އެ ގާނޫނުގައި ބުނެފައިވެ އެވެ.