15 Jan 2018, 21:40
ލީބިއާގެ ދެ ޖަމާއަތެއްގެ ދެމެދުގައި ހިނގި ކުރިމަތިލުންތަކެއްގެ ސަބަބުން ނުވަ މީހަކު މަރުވެއްޖެއެވެ.
އެކުރިމަތިލުންތަކުގެ ސަބަބުން އެ ގައުމުގެ މައި އެއާޕޯޓު ވެސް ވަނީ ބަންދު ކޮށްފައވެ.
އެގައުމުގެ ސަލާމަތީ ބާރުތަކާ ހަވާލާދީ އަލްޖަޒީރާ ބުނީ ވަކި އެއްޗެއް އަންގަންދެން ލީބިއާގެ މައި އެއާޕޯޓު ބަންދުކޮށްފައިވާ ކަމަށެވެ.
ބުގްރާ ގުރޫޕުން ފެށި މި ހަމަނުޖެހުމުގައި 32 މީހަކު ޒަހަމްވެފައިވާކަމަށްވެސް ރިޕޯޓުތައް ބުނެއެވެ.
ލީބިއާގެ ވެރިރަށް ޓްރިޕޮލީގައި ހުންނަ އެގައުމުގެ މައި އެއާޕޯޓަށް އެގައުމުގައި 2014 ވަނަ އަހަރު ހިނގި ހަމަނުޖެހުންތަކުގައިވެސް ވަނީ ގެއްލުންތައް ލިބިފައެެވެ.
އަރަބި ބަހާރަށްފަހު ލީބިއާ އަކީ ހަމަނުޖެހުންތައް ބޮޑުވެފައިވާ ގައުމެކެވެ. ހާއްސަކޮށް އެގައުމުގެ ކުރީގެ ލީޑަރު ގައްޒާފީގެ މަރަށްފަހު ލީބިއާގައި ހިނގަމުންދާ ހަމަނުޖެހުންތައް ވަނީ އިތުރުވެފައެވެ.
ލީބިއާގައި ހަމަޖެހުން ގާއިމްކުރުމަށް އދ. އިން އިސްނަގައިގެން ތޫނިސްގައި ވަނީ ވާހަކަތައް ބާއްވައިފައެވެ. ނަތީޖާއެއްގެ ގޮތުން މި އަހަރު ތެރޭ އެގައުމުގައި ރިޔާސީ އިންތިހާބާއި އާންމު އިންތިހާބު ބޭއްވުމަށް ވަނީ ތާވަލް ކޮށްފައެވެ.