17 Jan 2018, 14:43
ނިމިދިޔަ ހަތަރު އަހަރަކީ ރާއްޖޭގެ ފަތުރުވެރިކަމަށް އެންމެ އުޖާލާ ހަތަރު އަހަރު ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ކ. އެނބޫދޫފަޅުގައި ތައިލެންޑުގެ ސިންހަ އެސްޓޭޓުން ތަރައްގީކުރާ "ކްރޮސްރޯޑްސް މޯލްޑިވްސް" އިންޓަގްރޭޓެޑް ރިސޯޓު މަޝްރޫއުގެ ދަށުން ހިއްކާފައިވާ ރަށްތަކުގައި ރީޓެއިލް އައުޓްލެޓްތައް ހެދުމަށް، ރާއްޖެއާއި ބޭރުގެ ވިޔަފާރިތައް ގުޅުވައިދިނުމަށް ފޯރަމެއް މިއަދު ވަނީ ފަށައިފައެވެ.
އެ ފޯރަމް ފެށުމުގެ ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ އެނބޫދޫފަޅުގައި ސިންހަ އެސްޓޭޓުން ހިންގާ މަޝްރޫއަކީ ރާއްޖޭގެ ފަތުރުވެރިކަމުގެ ބްރޭންޑު މުޅިން ބަދަލުކޮށްލާނެ މުހިންމު މަޝްރޫއެއް ކަމަށެވެ.
މިނިސްޓަރު ސައީދު ވިދާޅުވީ ރާއްޖެ މިވަގުތު ކަޑައްތުކުރަމުން ދަނީ ހަލުއި ތަރައްގީގެ ވަރަށް މުހިންމު ދުވަސްތަކެއް ކަމަށެވެ.
"ޔަގީންކަމާއެކު އަޅުގަނޑަށް ދަންނަވަން ކެރޭނެ، މިދިޔަ ހަތަރު އަހަރަކީ ރާއްޖޭގެ އެންމެ އުޖާލާ ހަތަރު އަހަރު. ވަކިން ޚާއްސަކޮށް ހޮޓެލްތައް ހިންގާ ފަރާތްތަކާއި ފަތުރުވެރިކަމުގެ ދާއިރާގެ ފަރާތްތަކަށް،
"ފަތުރުވެރިން ރާއްޖެ އަންނަ އަދަދު އިތުރުވެއްޖެ. ދުނިޔޭގެ އެންމެ މަގުބޫލު ފަތުރުވެރި ބްރޭންޑުތައް ރާއްޖެ ގެނެސް، ލަގްޒަރީ ބްރޭންޑުތަކަށް އޮތް ގްލޯބަލް ޑިމާންޑު ކެޕިޓަލައިޒްކުރުމުގެ މަސައްކަތް އެބަ ކުރެވޭ،" ސައީދު ވިދާޅުވިއެވެ.
މިނިސްޓަރު ވިދާޅުވީ މިއަދުގެ ފޯރަމް ބާއްވާކަމީ، އެނބޫދޫފަޅުގެ "ކްރޮސްރޯޑްސް މޯލްޑިވްސް" މަޝްރޫއުގައި ދިވެހީންވެސް ބައިވެރިކުރުވަން ސިންހަ އެސްޓޭޓުން ބޭނުންވާ ކަމުގެ ހެއްކެއް ކަމަށެވެ.
"އަޅުގަނޑަށް އެނގިފައިވާ ގޮތުގައި ރާއްޖޭގެ އެކި ފަންތީގެ ވިޔަފާރިތަކަށް އިންވެސްޓް ކުރެވޭނެ ފަދަ، ބޭރުގެ އެކި ފަންތީގެ ކުންފުނިތައް މިއަދު މިތަނުގައި އެބަ ތިބި،" މިނިސްޓަރު ވިދާޅުވިއެވެ.
މި ރަސްމިއްޔާތުގައި ޓޫރިޒަމް މިނިސްޓަރު މޫސާ ޒަމީރު ވިދާޅުވީ، ސިންހަ އެސްޓޭޓު ފަދަ ކުންފުންޏަކުން ރާއްޖޭގައި ބިޔަ މަޝްރޫއެއް ހިންގުމަކީ ރާއްޖޭގައި އިންވެސްޓަރުންނަށް އޮތް އިތުބާރުހުރި، ފަހި މާހައުލު ދައްކުވައިދޭ ކަމެއް ކަމަށެވެ.
"ރާއްޖޭގެ އިގްތިސާދަށް ރައީސް ޔާމީން ގެނެސްދެއްވި ބަދަލާ މެދު ސުވާލެއް ނުއުފެދޭނެ. މިކަން ފެނޭ މިހާރު ކުރިއަށްދާ ތަރައްގީގެ މަޝްރޫއުތަކުން. ކްރޮސްރޯޑްސް މޯލްޑިވްސް މަޝްރޫއަކީ އެކަމުގެ ބޮޑު ހެއްކެއް،" ޒަމީރު ވިދާޅުވިއެވެ.