ނާޒާހަތްތެރިކަން އިތުރު ކުރުމަށްޓަކައި އެންޓި ކޮރޮޕްޝަން ކޮމިޝަން (އޭސީސީ) އާ ރާއްޖޭގެ ގައުމީ ޔުނިވާސިޓީ ( އެމްއެންޔޫ) އާ ދެމެދު ފަހުމުނާމާއެއްގަިއ ސޮއި ކޮށްފިއެވެ.
މި ފަހުމުނާމާގައި އޭސީސީގެ ފަރާތުން ސޮއި ކުރެއްވީ، އެ ކޮމިޝަނުގެ ރައީސް އާދަމް ޝާމިލްއެވެ. އަދި އެމްއެންޔޫގެ ފަރާތުން ސޮއި ކުރެއްވީ، ވައިސް ޗާންސެލަރ ޑރ. އައިޝަތު ޝެހެނާޒް އާދަމްއެެވެ.
އޭސީސީން ބުނީ، މި ފަހުމުނާމާގެ މަގުސަދަކީ ކޮރަޕްޝަން ވިޔަނުދިނުމަށްޓަކައި ދެ މުއައްސަސާ ގުޅިގެން ކުރެވޭނެ މަސައްކަތް ދެނެގަނެ، އެކަންކަން ހާސިލް ކުރުން ކަމަށެވެ. މީގެ އިތުރުން ކޮމިޝަނުން ދޭ ލަފާ ތަންފީޒު ކުރުމުގައި ގުޅިގެން މަސަކަތް ކުރުމާއި، ފަންނީ އެހީތެރިކަން ބަދަލުކުރުމުގައި ހަރުދަނާ ނިޒާމެއް ގާއިމް ކުރުން ވެސް މި އެއްބަސްވުމުގައި ހިމެނޭ ކަމަށް އޭސީސީން ވަނީ ބުނެފައެވެ.
އޭސިސީން ބުނީ، މި ފަހުމުނާމާގެ ދަށުން އޭސިސީން އެމްއެންޔޫގެ މުވައްޒިފުންގެ ނަޒާހަތްތެރިކަން ކުރިއެރުވުމަށް މަހާސިންތާތަކާއި، ވޯކޮޝޮޕްތައް ބޭއްވުމުގައި އެހީތެރިކަން ފޯރުކޮށްދޭނެ ކަމަށެވެ. އަދި ކޮރަޕްޝަން ހުއްޓުވުމަށް ދައުލަތުގެ އިދާރާތަކާއި، މަދަނީ ޖަމިއްޔާތަކަށް ހޭލުންތެރިކުރުމުގެ ޕްރޮގްރާމްތައް އެމްއެންޔޫއާ ގުޅިގެން ހިންގުމާއި ދައުލަތް ހިންގުމުގައި އަމާނާތްތެރިކަން އިތުރުކުރުމަށް ބޭނުންވާ ކޯސްތައް ފަރުމާކޮށް ހިނގުން ހިމެނޭ ކަމަށް ވެސް އޭސީސީން ވަނީ ބުނެފައެވެ.
އޭސީސީން ބުނީ، މި ފަހުމުނާމާގައި އެމްއެންޔޫގެ ފަރާތުން ސިޔާސަތުތަކާއި އިސްތިރާޖީތައް އެކުލަވާލުމުގައި ކޮރަޕްޝަން ވިޔަނުދިނުމަށް ކޮމިޝަނާއެކު ގުޅިގެން މަސައްކަތްކުރުމާއި، އެންޓި- ކޮރަޕްޝަން ސިޔާސަތުތައް ތައްޔާރުކުރުމުގައި ބޭނުންވާ ފަންނީ ލަފާ ފޯރުކޮށްދިނުން ހިމެނޭ ކަމަށެވެ. މީގެ އިތުރުން، ނަޒާހަތްތެރިކަމާ ގުޅޭ ދިރާސާތައްކޮށް ޖަރނަލްތައް ޝާއިޢުކުރުމުގައިވެސް ޔުނިވަރސިޓީން އެހީތެރިވެދޭނެއެވެ.
އޭސީސީން ބުނީ، މި ފަހުމުނާމާއަކީ ކޮރަޕްޝަނާ ދެކޮޅަށް ކުރާ މަސައްކަތް އިތުރަށް ހަރުދަނާކޮށް، ދައުލަތުގެ އެކި ދާއިރާތަކުން ކޮރަޕްޝަނުގެ ހިރާސް ކުޑަކުރުމަށް އެޅުނު މުހިއްމު ފިޔަވަޅެއް ކަމަށެވެ.