ސަރުކާރުން ފަށަން ނިންމާފައިވާ ޓެކްސީ ލައިންގެ ހިދުމަތް ކުރިއަށް އޮތް ފިތުރު ޢީދު ދުވަހު ފެށުމަށް މަސައްކަތް ކުރަމުންދާ ކަަމަށް ޓްރާސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރީންގެ ބައްދަލްވުމުގައި ވާހަކަދައްކަވަމުން މިނިސްޓަރު އަމީން ވަނީ ސަރުކާރުގެ ޓެކްސީ ލައިންގެ ހިދުމަތް ފެށުމަށް މިހާރު ކުރަމުންދާ މަސައްކަތުގެ އެންމެ ފަހުގެ ތަފްސީލު ހިއްސާކުރައްވާފަ އެވެ.
މިނިސްޓަރު ވިދާޅުވީ ޓެކްސީ ލައިންގެ ހިދުމަތް ފެށުން ލަސްވެގެން ދިޔަައީ ޓެކްސީތަކަށް ބަދަލުތަކެއް ގެންނަން ޖެހިގެން ކަމަށާއި، މިއީ ރާއްޖޭގައި މި ހިދުމަތް ދޭން ޖެހެނީ މޫދާއި ވަރަށް ކައިރީގައި ކަމުން އެކަމަށްޓަކައި ގެންނަން ޖެހުނު ބަދަލެއް ކަމަށެވެ.
ޓެކްސީ ލައިންގައި ބޭނުންކުރާނީ ތިން މޮޑެލެއްގެ ކާރުތަކެވެ. އޭގެ ތެރެއިން އެއް މޮޑެލްގެ ކާރުތައް ގެންނަނީ ތައިލެންޑުންނެވެ. އަނެއް ދެ މޮޑެލްގެ ކާރުތައް ގެންނަނީ ޗައިނާއިންނެވެ. އެގޮތުން މިނިސްޓަރު ވިދާޅުވީ ޓެކްސީ ލައިންގެ ހިދުމަތް ފެށުމަށް 150 ކާރު ރާއްޖެ ގެނައުމަށް ވަނީ ނިންމާފަ އެވެ. އަދި ކާރުތައް ގެންނާނީ ދެ ބުރެއްގެ މަތީން ކަމުގައި ވެސް މިނިސްޓާ ވިދާޅުވި އެވެ.
އޭގެ ތެރެއިން އެއް ބެޗުގެ ކާރުތައް މިއަދު ލަންކާ ޕޯޓަށް ވަންނާނެ ކަމަށާ އެ ބެޗުގެ ކާރުތައް މި މަހުގެ 11 ވަނަ ދުވަހު ރާއްޖެ ގެނެވޭނެ ކަމަށް އެމްޓީސީސީން މައުލޫމާތު ދީފައިވާ ކަމަށެވެ. އަދި އަނެއް ބެޗުގެ ކާރުތައް ގެނެވޭނެ ތާރީހެއް އަންނަ ހުކުރު ދުވަހު ޔަގީންކުރެވޭނެ ކަމަށް ވެސް މިނިސްޓަރު ވިދާޅުވި އެވެ.
ސަރުކާރުގެ ޓެކްސީ ލައިން ހިންގާނީ އެމްޓީސީސީންނެވެ. އެމްޓީސީސީއިން ޓެކްސީ ލައިންގެ ހިދުމަތަށް ނަގަނީ 407 ޑްރައިވަރުންނެވެ. އޭގެތެރެއިން 122 ޑްރައިވަރުން ހަމަޖައްސާނީ ފުލްޓައިމްކޮށެވެ.