ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ބައިނަލްއަގުވާމީ ފެންވަރުގައި ބާއްވަމުން އަންނަ ސްޕޯޓްސް ފިޝިން ޓޯނަމެންޓް "ބުރުނު ބޯމަ"އިގެ ދެވަނަ އެޑިޝަންގައި ބައިވެރިވުމުގެ ފުރުސަތު ހުޅުވާލައިފި އެވެ.
ވީއެމްސީ އިން އާންމުކުރި ބަޔާނެއްގައި ބުނީ އެ ޓޯނަމެންޓް ކުރިއަށް ގެންދާނީ ޖޫން 13 އިން ފެށިގެން 15 ވަނަ ދުވަހުގެ ނިޔަލަށް ކަމަށެވެ.ވީއެމްސީ އިން އިސްނަގައިގެން ބާއްވާ މި މުބާރާތަކީ ރާއްޖޭގެ މުއްސަނދި މަސްވެރިކަމުގެ ތާރީހާއި ސަގާފަތް ދުނިޔެއަށް ދައްކާލުމުގެ އިތުރުން، ރާއްޖޭގައި "ހައި-ވެލިއު އެޑްވެންޗާ ޓޫރިޒަމް" އިޝްތިހާރުކުރުމަށް ހިންގޭ މުހިންމު މަޝްރޫއެއް ކަމަށް ވީއެމްސީ އިން ބުނެއެވެ.
ފުރަތަމަ އެޑިޝަންއަށް ވުރެ ފުޅާކޮށް އެ މުބާރާތުގެ ދެވަނަ އެޑިޝަން ބޭއްވުމަށް ވީއެމްސީ އިން ތައްޔާރުވަމުން އަންނަ ކަން ފާހަގަކޮށް، މި އަހަރުގެ އެޑިޝަން ކުރީ އަހަރަށްވުރެ ދެގުނަ ބޮޑުވާނެ ކަމަށް ލަފާކުރެވޭ ކަމަށް ވީއެމްސީ އިން ބުނެއެވެ.
ވީއެމްސީ އިން ބުނީ މި މުބާރާތް ކުރިއަށްދާނީ އިންޓަނޭޝަނަލް ގޭމް ފިޝިން އެސޯސިއޭޝަން (އައިއެފްޖީއޭ)ގެ މިންގަނޑުތަކާ އެއްގޮތަށް، "ކެޗް އެންޑް ރިލީޒް" ނުވަތަ މަސް ބޭނުމަށްފަހު އަލުން ކަނޑަށް ދޫކުރުމުގެ އުސޫލުތަކަށް އިސްކަންދީގެންކަމަށެވެ.
މީެ އިތުރުން މުބާރާތުގެ ތިން ދުވަހު ވެސް، ކޮންމެ ދުވަހަކު ފަތިހު 05:00 އިން ހަވީރު 18:30 އަށް މަސްވެރިކަމުގެ ހަރަކާތްތައް ކުރިއަށްދާނެ ކަމަށާއި، މުބާރާތުގެ އެންމެ މޮޅު ޓީމަށް 25,000 އެމެރިކާ ޑޮލަރުގެ ފައިސާގެ އިނާމު ހުށަހަޅާފައިވާ އިރު، "އެންމެ މޮޅު ކެޕްޓަން" އަދި "އެންމެ މޮޅު މަސްވެރިޔާ" ފަދަ ޝަރަފުވެރި މަގާމުތައް ހޮވުމަށް ހަމަޖައްސާފައިވާކަމަށް ވީއެމްސީ އިން ބުނެއެވެ.
ބުރުނު ބޮމަ ސްޕޯޓްސް ފިޝިން ޓޯނަމެންޓުގެ ފުރަތަމަ އެޑިޝަން ކުރިއަށް ގެންގޮސްފައި ވަނީ 2025 ވަނަ އަހަރު އެވެ. ދުބާއީގެ ޓީމަކާއި ދިވެހި ޓީމުތަކުން ބައިވެރިވި މި މުބާރާތް ވެގެން ގޮސްފައި ވަނީ ވާދަވެރި، އަދި ތަފާތު ތަޖުރިބާތަކެއް ބައިވެރިންގެ މެދުގައި ހިއްސާކުރެވުނު ތާރީހީ މުބާރާތަކަށެވެ.
މިދިޔަ އަހަރުގެ މުބާރާތް ކާމިޔާބުކުރި ފަރާތްތަކުން ފާހަގަކޮށްފައިވާ ގޮތުގައި، ކުރިއާލާ ރަޖިސްޓްރީވެ، ރާއްޖޭގެ ތަޖުރިބާކާރުންނާ ގުޅިގެން އިންޑިއާ ކަނޑުގެ މަސްމަހާމެހީގެ އާދަކާދަތަކަށް ފަރިތަވުމަކީ މުބާރާތުގައި ކުރިހޯދުމަށް ލިބުނު ވަރަށް ބޮޑު ފުރުސަތެކެވެ.
މި މުބާރާތުގައި ބައިވެރިވުމަށް ޝައުގުވެރިވާ ޓީމުތަކުން މިއަދުން ފެށިގެން މުބާރާތުގެ ރަސްމީ ވެބްސައިޓް މެދުވެރިކޮށް ރަޖިސްޓްރީ ކުރެވޭނެއެވެ. ރަޖިސްޓްރީ ކުރުމުގެ މައިގަނޑު މުއްދަތު 30 އޭޕްރީލް 2026 އަށް ހަމަވާއިރު، އިތުރު ފީއަކާއެކު ރަޖިސްޓްރީވުމުގެ ފުރުސަތު 31 މޭ 2026 އާ ހަމައަށް އޮންނާނެ ކަމަށް ވީއެމްސީ އިން މައުލޫމާތުދެއެވެ.
މުބާރާތް ނިމިގެންދާނީ ޖޫން 16 ވަނަ ދުވަހު ބާއްވާ ކުލަގަދަ ހަފުލާއަކުން ކަމަށާއި، އެ ހަފުލާގައި ރާއްޖޭގެ ސަގާފީ ހަރަކާތްތައް ދައްކާލުމުގެ އިތުރުން، ދުނިޔޭގެ ފެންވަރުގެ މަސްވެރިންގެ ހުނަރުތައް ފާހަގަކޮށް، ރަސްމީކޮށް އިނާމު ދިނުން އޮންނާނެކަމަށްވެސް ވީއެމްސީ އިން ބުނެއެވެ. އަދި "ބުރުނު ބޮމާ" އަކީ މިހާރު ދުނިޔޭގެ ސްޕޯޓް ފިޝިން ކަލަންޑަރުގައި ފާހަގަކޮށްލެވޭ، ރާއްޖޭގެ ކަނޑުފަޅުގެ މުއްސަނދިކަން މުޅި ދުނިޔެއަށް އިޝްތިހާރުކޮށްދޭ މުހިންމު ހަރަކާތެއްކަމަށް ވީއެމްސީ އިން ބުނެއެވެ.