މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލުމާއެކު އެސްޓީއޯއިން ވިއްކާ ތެލުގެ އަގު ބޮޑުކޮށްފި އެވެ.
ތެޔޮ ވިއްކާ މައި ކުންފުނި، އެސްޓީއޯއިން ބުނީ، އެ ކުންފުނީގެ ދަށުން ހިންގާ އެފްއެސްއެމްގެ ޕެޓްރޯލް ޝެޑުތަކުން ޕެޓްރޯލާއި ޑީސަލް ވިއްކާ އަގު މިއަދުން ފެށިގެން ބަދަލުވެފައިވާ ކަމަށެވެ.
މި ބަދަލާއެކު ކުރިން 13.50ރ. އަށް ވިއްކަމުންދިޔަ ޕެޓްރޯލް ލީޓަރެއް މިއަދުން ފެށިގެން ވިއްކަމުން ދާނީ 16.01ރ. އަށެވެ. މިއީ 2.51ރ. ގެ ބޮޑުވުމެކެވެ.
ޑީސަލް ލީޓަރެއް ކުރިން ވިއްކަމުން ދިޔައީ 13.92ރ. އަށެވެ. ނަމަވެސް މިއަދުން ފެށިގެން ޑީސަލް ލީޓަރެއް ވިއްކަމުން ދާނީ 17.54ރ. އަށެވެ. މިއީ 3.62ރ. ގެ ބޮޑުވުމެކެވެ.
އެސްޓީއޯއާ އެކު، ހޯކްސް އިން ވިއްކާ ޕެޓްރޯލާއި ޑީސަލްގެ އަގުތައް ވެސް ވަނީ ހަމަ އެ އަދަދުން ބޮޑުކޮށްފައި ކަމަށް އެ ކުންފުނިން ރޭ ނެރުނު ބަޔާނެއްގައި ވަނީ ބުނެފައެވެ.
މިއަދު ދުނިޔޭގެ ބަޒާރުގައި ސާފުނުކުރާ ތެޔޮ ފީފާއެއް ހުރީ 90 ޑޮލަރާ ކައިރިއަށް އަރާފައެވެ. މިއީ ހަނގުރާމައިގެ ކުރިން 65 ޑޮލަރުގައި ހުރި އެއްޗެކެވެ. އަގުތަކަށް ބަލާނަމަ ތެލުގެ އެކިއެކި ބާވަތްތަކުގެ އަގު އެވްރެޖްކޮށް 10 އިންސައްތަ ވަނީ އުފުލިފައެވެ.
އިޒްރޭލާއި އެމެރިކާއިން ފެށި ހަނގުރާމަ އިތުރަށް ފުޅާވެ ތެލުގެ ބާޒާރަށް ލޮޅުން އެރީ، ތެޔޮ އުފައްދާ ގަލްފުގެ ގައުމުތަކުގައި ހުންނަ އެމެރިކާގެ ބޭސްތަކަށްް އީރާނުން ހަމަލާތައް ދޭން ފެށުމާއި، ބައެއް ހަމަލާތައް ސީދާ ތެޔޮ ކާރުހާނާތަކަށް އަމާޒުވެ އެތަންތަނަށް ގެއްލުންތަކެއް ލިބެން ފެށުމުންނެވެ.
މީގެ އިތުރުން މެދުއިރުމަތިން ތެޔޮ ސަޕްލައި ކުރުމަށް ބޭނުންކުރާ ހޮރްމުޒް ކަނޑުއޮޅި އީރާނުން ވަނީ ބަންދުކޮށްފަ އެވެ.