ފްލައިޓްތައް ކެންސަލްވުމުން އުމްރާ އަށް ނުފުރިފަ ތިބި މީހުން ފުރުވޭނެ ގޮތެއް ހޯދުމަށް މަސައްކަތް ކުރަމުންދާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މީޑިއާތަކަަށް ފޮނުއްވި މެސެޖެއްގައި މިނިސްޓަރު ވިދާޅުވީ އެކި ކުންފުނިތަކުން ޢުމްރާއަށް ދިއުމަށް އުޅުނު ފަރާތްތަކަށް ނުފުރިފައިވުމާއި، ޓްރާންސިޓްކޮޮށް ފުރަން އުޅުނު ބައެއް މީހުންގެ ފުލައިޓު ކެންސަލްވުމުގެ ސަބަބުން، ނުފުރި ތިބި މީހުންގެ ތެރެއިން އުމްރާއަށް ފުރަން ބޭނުންވެފައި ތިބި މީހުން އުމްރާއަށް ފުރުވޭނެ ގޮތެއް ހޯދުމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު އިރުޝާދު ދެއްވާފައިވާކަމަށެވެ.
އެގޮތުން ފުރޭނެ ގޮތެއް ހޯދުމުގެ މަސައްކަތް އިސްލާމިކް މިނިސްޓްރީއާއި މޯލްޑިވްސް ހައްޖު ކޯޕަރޭޝަނާއި މޯލްޑިވިއަން ގުޅިގެން ފަށާފައިވާ ކަމަށް މިނިސްޓަރު ވިދާޅުވިއެވެ.
މިވަގުތާހަމަ އަށް 150 މީހުން ފުރަން ބޭނުންވެފަ ތިބިކަން ފާހަގަކުރައްވާ މިނިސްޓަރު ވިދާޅުވީ، ފްލައިޓް ޗާޓަރު ކުރެވޭނެ ގޮތެއްވެއްޖެ ނަމަ އޭގެ އިތުރުން ވެސް ޖާގަ އެއް ހޯދަން ބޭނުންވާ ފަރާތްތަކަށް ޖާގަ ހުރި މިންވަރަކުން ދެވޭނެ ކަމަށެވެ. އަދި ވަގުތު ކުޑަތަންވެފައިވުމުން އެކަމުގައި ހުރި ދަތިތައް ހައްލުކުރެވޭތޯ މަސައްކަތްކުރަމުންދާ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރުގެ މެސެޖުގައި، ރައްޔިތުންނާ ގުޅުން ހުރި މިފަދަ ކަންކަން ހައްލުކުރުމަށް ރައީސް ބަހައްޓަވަމުން ގެންދަވާ އަހައްމިއްޔަތަށްޓަކައި ވަނީ ޝުކުރު ދަންނަވާފައެވެ.
މިފަދަ ކޮންމެ ކަމެއްގައި ވެސް ރައްޔިތުންނަށް ދޭ އެހީތެރިކަން ފާހަގަ ކުރައްވާ މިނިސްޓަރު ވިދާޅުވީ ދަތުރުގެ ހަރަދު ކުރާނީ އެހެންޏާ ވެސް އުމްރާ ދަތުރުގައި އޮންނަ އުސޫލުން އުމްރާވެރިން ކަމަށެވެ.