އެކި ސަބަބުތަކާހުރެ މިއަހަރުގެ ރަމަޟާން މަހު، އުމްރާގެ އަޅުކަމަށް ނުފުރި ތިބި ފަރާތްތަކަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ ދަށުން ހާއްސަ އިންތިޒާމުތަކެއް ހަމަޖެއްސުމުގެ މަސައްކަތް މޯލްޑިވްސް ހައްޖު ކޯޕަރޭޝަނުން ފަށައިފިއެވެ.
ހައްޖު ކޯޕަރޭޝަނުން ނެރުނު ނޫސްބަޔާނެއްގައި ބުނީ އެކި ގްރޫޕްތަކުގެ ހަވާލުގައި ރަމަޟާންމަހުގެ އުމްރާއަށް ދިއުމަށް ނިންމާފައިވަނިކޮށް، ފްލައިޓުތައް ކެންސަލްވުމާއި، އެނޫންވެސް ދަތިތަކާހުރެ ފުރޭގޮތް ނުވެފައިވާ ފަރާތްތަކަށް، ރައީސްގެ އިރުޝާދުގެ ދަށުން، އެ ކޯޕަރޭޝަނުން ހާއްސަ އިންތިޒާމުތަކެއް ހަމަޖެއްސުމުގެ މަސައްކަތް ކުރަމުންދާކަމަށެވެ.
އެ ކޯޕަރޭޝަނުން ބުނީ އެކަމަށްޓަކައި ފްލައިޓު ޗާޓަރު ކުރެވޭގޮތް ވެއްޖެނަމަ އެކަން ކުރުމާއި، އެކޮމޮޑޭޝަން ހަމަޖެއްސުމަށް އެ ކޯޕަރޭޝަނުން މަސައްކަތް ކުރަމުންދާކަމަށެވެ.
މި ރަމަޟާންމަހު އުމްރާގެ އަޅުކަން އަދާކުރުމަށް އެދި، ދިމާވި އެކި ސަބަބުތަކާހުރެ ނުފުރި ތިބި ފަރާތްތަކުގެ ތެރެއިން މި ފުރުސަތުގެ ބޭނުން ހިފަން ބޭނުންވާ ފަރާތްތަކުން 5 މާޗްގެ މެންދުރު 12:00ގެ ކުރިން އީމެއިލް އެޑްރެސް sales@mhcl.mv އަށް މައުލޫމާތު ފޮނުވުމަށް އެ ކޯޕަރޭޝަނުން ވަނީ އެދިފައެވެ.
މީގެ އިތުރުން ފުރޭނެ ގޮތެއް ހޯދުމުގެ މަސައްކަތް އިސްލާމީ ކަންތައްތަކާ ބެހޭ ވުޒާރާއާއި މޯލްޑިވްސް ހައްޖު ކޯޕަރޭޝަން އަދި މޯލްޑިވިއަން ގުޅިގެން ފަށާފައިވާކަން އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދުވެސް ވަނީ ހާމަކުރައްވާފައެވެ.
މިވަގުތާހަމަ އަށް 150 މީހުން ފުރަން ބޭނުންވެފަ ތިބިކަން ފާހަގަކުރައްވާ މިނިސްޓަރު ވިދާޅުވީ، ފްލައިޓް ޗާޓަރު ކުރެވޭނެ ގޮތެއްވެއްޖެ ނަމަ އޭގެ އިތުރުން ވެސް ޖާގަ އެއް ހޯދަން ބޭނުންވާ ފަރާތްތަކަށް ޖާގަ ހުރި މިންވަރަކުން ދެވޭނެ ކަމަށެވެ. އަދި ވަގުތު ކުޑަތަންވެފައިވުމުން އެކަމުގައި ހުރި ދަތިތައް ހައްލުކުރެވޭތޯ މަސައްކަތްކުރަމުންދާ ކަމަށްވެސް މިނިސްޓަރު ވިދާޅުވިއެވެ.
މިފަދަ ކޮންމެ ކަމެއްގައި ވެސް ރައްޔިތުންނަށް ދޭ އެހީތެރިކަން ފާހަގަ ކުރައްވާ މިނިސްޓަރު ވިދާޅުވީ ދަތުރުގެ ހަރަދު ކުރާނީ އެހެންޏާ ވެސް އުމްރާ ދަތުރުގައި އޮންނަ އުސޫލުން އުމްރާވެރިން ކަމަށެވެ.