މި އަހަރު 113،382 ގޭބިސީއަކަށް މަސްދަޅު ކޭސް ދޫކޮށްފައިވާ ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކްވަރކްސް އާދަމް ޝަރީފު އުމަރު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޝަރީފު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް 1447 ވަނަ އަހަރުގެ ރަމަޟާންމަހަށް ކޮންމެ ގޭބިސީއަކަށް ސަރުކާރުން ހަދިޔާކުރާ މަސްދަޅު ކޭސްތައް ބެހުމުގެ މަސައްކަތް ރޭ ނިންމާލާފައިވާ ކަމަށާއި، މި އަހަރު 113،382 ގޭބިސީއަކަށް މަސްދަޅު ކޭސް ދޫކޮށްފައިވާ ކަމަށެވެ.
މިނިސްޓަރ ވަނީ މިހިނގާ ރަމަޟާން މަހު ރޯދަ ހަދިޔާ ބެހުމުގެ ކަންކަން ކުރިއަށް ދިޔަ ގޮތުގެ ތަފްސީލު މީޑިއާތަކާއި ހިއްސާކުރައްވަމުން، 4 މާރިޗުގެ ނިޔަލަށް މަސްދަޅު ކޭސްތައް ބެހުން ނިންމާލާފައިވާއިރު މާލޭ ސަރަހައްދުން ދޫކުރެވިފައިވަނީ 55،667 މަސްދަޅު ކޭސް ކަމަށް ވިދާޅުވެފައެވެ. އަދި އަތޮޅުތަކުގެ ގޭބިސީތަކަށް ބެހުމަށް ފޮނުވިފައިވަނީ، 57،715 މަސްދަޅު ކޭސް ކަމަން ފާހަގަކުރައްވާ މިނިސްޓަރު ވިދާޅުވީ މުޅި ޖުމްލަ 113،382 މަސްދަޅު ކޭސް ދޫކޮށްފައިވާ ކަމަށެވެ.
ފާއިތުވި 2 އަހަރުގެ ތަސާސްހިސާބުތައް ހިއްސާކުރައްވަމުން މިނިސްޓަރ ވިދާޅުވީ ރޯދަ ހަދިޔާގެ ގޮތުގައި މި ދިޔަ އަހަރު އަތޮޅުތަކުގެ ގޭބިސީތަކަށް ބެހުމަށް 60،712 ކޭސް ފޮނުވިފައި ވިޔަސް، މި އަހަރު އަތޮޅުތަކަށް ފޮނުވަން ޖެހުނީ 57،715 ކޭސް ކަމަށެވެ. އެއީ 2،997 ގެ މަދުވުމެކެވެ.
މިނިސްޓަރު ވިދާޅުވީ މި ދިޔަ އަހަރު މާލޭ ސަރަހައްދަށް ދޫކޮށްފައިވަނީ 50،525 ކޭސް ކަމަށް ވިޔަސް، މި އަހަރު ދޫކުރެވިފައި ވަނީ 55،667 ކޭސް ކަމަށެވެ. އެހެންކަމުން މިއީ 5،142 ކޭހުގެ އިތުރު ވުމެއް ކަމަށް މިނިސްޓަރު ވިދާޅުވިއެވެ. 1446 ވަނަ އަހަރު ރޯދަ ހަދިޔާގެ ގޮތުގައި މުޅި ރާއްޖެއަށް ދޫކުރެވުނީ 111،237 މަސްދަޅު ކޭސް ކަމަށާއި މި އަހަރު އެ އަދަދުވަނީ 113،382އަށް އަރާފައި ކަމަށް މިނިސްޓަރު ވިދާޅުވިއެވެ. މިއީ 2،145 ކޭހުގެ އިތުރު ވުމެކެވެ.
މިއީ ރޯދަ ހަދިޔާ ޕްރޮގްރާމް ހިންގާ 3 ވަނަ އަހަރުކަން ފާހަގަކުރައްވާ މިނިސްޓަރު ވިދާޅުވީ މި ދިޔަ އަހަރެކޭ އެއްފަދައިން މި އަހަރު ވެސް ސަރުކާރުން ދޫކޮށްފައިވަނީ ދިވެހި ކޮންމެ އާއިލާއަކަށް 48 ދަޅުގެ މަސްކޭހެއް ކަމަށެވެ. އަދި ދިވެހި ގޭބިސީތަކަށް ދިނުމަށް ރައީސް ނިންމާފައިފައިވާ ރޯދަ ހަދިޔާ، ދޫކުރާނެ ގޭބިސީތައް އަތޮޅުތެރޭގެ ރަށްރަށުގައި ކަނޑައަޅައި އެ ލިސްޓްތައް ތައްޔާރު ކޮށްވާފައިވަނީ ކައުންސިލް އިދާރާތަކުން ކަމަށާއި މާލޭ ސަރަހައްދުގައި ގޭބިސީތައް ދެނެގަތުމަށް ޓަކައި އަސާސީ މަސްދަރެއްގެ ގޮތުގައި ބަލާފައިވަނީ، ސްޓެލްކޯގެ ޑޮމެސްޓިކް ކަރަންޓް މީޓަރު ކަމަށް އޭނާ ވިދާޅުވިއެވެ.
މި އަހަރުގެ ރޯދަ ހަދިޔާ އާންމުކޮށް ބެހުމުގެ އަމަލީ މަސައްކަތް ފެށިފައިވަނީ 2026 ޖަނަވަރީ 24 ގައެވެ. މާލޭ ސަރަހައްދުގައި 15 މަރުކަޒެއް ގާއިމު ކުރެވި ރޯދަ ހަދިޔާ ދޫކުރެވުނެވެ.
ޝަރީފްގެ ވާހަކައިގައި އިތުރަށް ވިދާޅުވީ ސަރުކާރުގެ ޕަބްލިކް ސެކްޓަރު އިންވެސްޓްމެންޓް ޕްރޮގްރާމްގެ ދަށުން ޢިމާރާތްކުރާ 6 ރަށެއްގެ ކައުންސިލު އިދާރާގެ މަސައްކަތް ނިމިފައިވާ ކަމަށެވެ. އެގޮތުން މަސައްކަތްތައް ނިމިފައިވާ ކައުންސިލު އިދާރާތަކަކީ ތ. ކިބިނދޫ، ށ. ނޫމަރާ، ލ. ކަލައިދޫ، މ. ރަތްމަންދޫ އަދި މ. ވޭވަށުގެ އިތުރުން އދ. ހަންޏާމީދޫ ކަމަށާއި 5 ރަށެއްގެ މަސައްކަތް މިހާރު ވެސް ހިނގަމުންދާކަމަށް މިނިސްޓަރު ފާހަގަކުރެއްވިއެވެ.
މަސައްކަތް މިހާރު ވެސް ހިނގަމުންދާ ރަށްތަކުގެ ގޮތުގައި މިނިސްޓަރު ފާހަގަކުރެއްވީ ފ. ބިލެތްދޫ، ހއ. ހޯރަފުށީ، އދ. ދިއްދޫ އަދި ގދ. ހޯޑެއްދޫގެ އިތުރުން ހދ. ކުރިނބީއެވެ.
މިނިސްޓަރ ވިދާޅުވީ ކ. ދިއްފުށި ކައުންސިލް އަދި ނ. މިލަދޫ ކައުންސިލް އިމާރާތުގެ ނުނިމި ހުރި މަސައްކަތް ނިންމުމަށް ޓަކައި، މި މަސް ހުސްވުމުގެ ކުރިން އެމްޓީސީސީއާ ހަވާލު ކުރެވޭނެ ކަމަށެވެ.