ޤައުމީ ޞިއްޙީ ލެބޯޓަރީ ގާއިމުކުރުން ވެގެންދާނީ މޯލްޑިވްސް ފުޑް އެންޑް ޑްރަގް އޮތޯރިޓީ، (އެމްއެފްޑީއޭ) ގެ ހިންގުން ހަރުދަނާކުރުމަށް ގެނެވޭ ބޮޑު ކުރިއެރުމަކަށް ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެއެވެ.
މިނިސްރު ނާޒިމް މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވަނީ، މިހާރު ޤައުމީ ޞިއްޙީ ލެބޯޓަރީ ހިނގަމުންދަނީ ޞިއްޙީ ވުޒާރާ ހިނގަމުންދާ އިމާރާތުގައިކަން ފާހަގަކުރައްވާ އެ އިމާރާތަކީ އެފަދަ ތަނެއް ހިންގުމަށް އެންމެ އެކަށީގެންވާ ތަނެއް ނޫން ކަމަށާައި އެއީ ޖާގައިގެ ގޮތުން ދަތި ބޭނުންވާ ވަސީލަތްތައް ޤާއިމްކުރުމަށް ދަތިކަން ދިމާވެފައިވާ ތަނެއްކަމަށް ވިދާޅުވެފައެވެ.
އަދި އެމްއެފްޑީއޭއަށް މި އަހަރާއި އަންނަ އަހަރު ގެނެވޭ އެންމެ ބޮޑު ކުރިއެރުމަކީ ޤައުމީ ޞިއްޙީ ލެބޯޓަރީ ޤާއިމްކުރުމުގެ މަސައްކަތް ކަމަށާއި މިއީ މިނިޒާމަށް ކުރިއަތް އޮތް ދެ އަހަރު ބަދަލެއް ގެނުވާނެ މަސައްކަތެއް ކަމަށް ނާޒިމް ވިދާޅުވިއެވެ.
"އެމްއެފްޑީއޭއަށް މިއަހަރާއި މި އަންނަ އަހަރު ގެނެވޭނެ އެންމެ ބޮޑު އެއް ކުރިއެރުމަކީ ސިއްހީ ގައުމީ ލެބޯޓަރީއެއް ގާއިމުކުރުމުގެ މަސައްކަތް.އަޅުގަނޑު އޭގެ ބައެއް ތަފްސީލަށްދާން ބޭނުން.އެއީ މި ނިޒާމަށް ކުރިއަށް އޮތް ދެ އަހަރުގެ ތެރޭގައި އެންމެ ބޮޑު ބަދަލެއް ގެނުވައިދޭނެ އެއްކަމަކަށް ވާތީވެ،މިހާރު ގައުމީ ސިއްހީ ލެބޯޓަރީ ހިންގަމުންދަނީ މިނިސްޓްރީ އޮފް ހެލްތުގައި އެ ހުންނަ އިމާރާތުގައި. ތިބޭފުޅުންނަށް އެނގިވަޑައިގަންނަވާނެ މި އިމާރާތަކީ މިފަދަ ލެބޯޓަރީއެއް ހިންގަން ވަރަށް ޖާގައިގެ ގޮތުން ކުޑަ، އަދި އެއަށް ބޭނުންވާ އެންމެ މުހިންމު ވަސީލަތްތައް ގާއިމުކުރުމަށްވެސް އެތަށް ގޮންޖެހުންތަކެއް ހުރި ކަމެއް. މިގޮންޖެހުންތަކުން އަރައިގަތުމަށްޓަކައި މިކަމަށް ހައްލުހޯދުމަށްޓަކައި އެ ހިދުމަތް އިތުރަށް ފުޅާކުރުމަށްޓަކައި ގައުމީ ސިއްހީ ލެބޯޓަރީގެ އާ އިމާރާތް ބިނާ ކުރުމަށް ބޭނުންވާ މަސައްކަތް ދިވެހި ސަރުކާރާ ޤޔޫރަޕިއަން އިންވެސްޓްމަންޓް ބޭންކު ގުޅިގެން އެހީއާއެކު އެތަނުގެ ލޯނެއްގެދަށުން އަޅުގަނޑުމެން ކުރިއަށްގެންދަނީ ގާތް ގަނޑަކަށް 25 މިލިއަން ޑޮލަރުގެ ޕްރޮޖެކްޓެއް މި ޕްރޮޖެކްޓަކީ." މިނިސްޓަރު ވިދާޅުވިއެވެ.
ގައުމީ ސިއްހީ ލެބޯޓަރީގައި 9 ފަންގިފިލާގެ އިމާރާތަކާއި 3 ފަންގިފިލާގެ އިމާރާތެއް ހެދުމަށް ވަނީ ހަމަޖެހިފައެވެ. މީގެ ތެރެއިން އެއް އިމާރާތް ޚާއްސަކުރާނީ އެމްއެފްޑީއޭގެ އިދާރީ އަދި ޓެކްނިކަލް މަސައްކަތްތަކަށެވެ. އަދި ދެވެނަ އިމާރާތް ޚާއްސަކުރާނީ ލެބޯޓަރީގެ މަސައްކަތްތަކަށް ޚާއްސަ އިމާރާތެއްގެ ގޮތުގައެވެ.
އެ ލެބޯޓަރީން ބެކްޓޮރޮލޮޖީގެ ދާއިރާއިން ބެކްޓީރީއާއި ގުޅުންހުރި ތަހުލީލުތައް ކުރުމުގެ ޤާބިލްކަން ލިބިގެންދާނެކަމަށް މިނިސްޓަރު ވިދާޅުވިއެވެ.
ގައުމީ ސިއްހީ ލެބޯޓަރީ ގާއިމުކުރުމަށް 26،000 އަކަ ފޫޓުގެ ބިން ހުޅުމާލެއިން ވަނީ ހަމަޖައްސާފައެވެ.