އެމެރިކާ އާއި އިސްރާއީލުން އިރާނަށް ދެމުންދާ ހަމަލާތަކުގައި އެގައުމުގެ 11 ހޮސްޕިޓަލެއް ހަލާކުކޮށްލާފައިވާކަމަށް އިރާނުގެ ހެލްތު މިނިސްޓްރީން ބުނެފިއެވެ.
ހަނގުރާމަ ހަވަނަ ދުވަހަކަށް ކުރިޔަށްދާއިރު އިރާނުގެ ހެލްތު މިނިސްޓްރީން ބުނީ މިހާތަނަށް އައިއިރު އިރާނުގެ 11 ހޮސްޕިޓަލަކާއި އެމަޖެންސީ 7 ސެންޓަރަކާއި 9 އެމްބިޔުލަންސް އަދި މެޑިކަލް އެހެން ފެސިލިޓީގެ ގޮތުގައި ހިންގަމުން އަންނަ ތަންތަނުގެ ތެރެއިން ހަތަރު ތަނެއް ހަލާކުވެފައިވާކަމަށެވެ.
ދުނިޔޭގެ ސިއްހަތާ ބެހޭ ޖަމިއްޔާ ޑަބްލިޔުއެޗްއޯއިން މީގެކުރިން ބުނެފައިވަނީ އެމެރިކާ އާއި އިސްރާއީލުން އިރާނަށް ދެމުންދާ ހަމަލާތަކުގެ ތެރެއިން 13 ހަމަލާއެއް އަމާޒުވެފައިވަނީ އިރާނުގެ ސިއްހީ ނިޒާމާ ގުޅުންހުރި ތަންތަނަށްކަމަށެވެ. ޑަބްލިޔުއެޗްއޯއިން އިތުރަށް ބުނެފައިވަނީ މިހަމަލާތަކުގައި ސިއްހީ ނިޒާމުގައި މަސައްކަތްކުރާ މީހުންގެ ތެރެއިން ހަތަރު މީހަކު މަރުވެފައިވާކަމަށާއި 25 މީހަކަށް އެކި ވަރުގެ އަނިޔާ ލިބިފައިވާކަމަށެވެ.
އިރާނުގެ އިދާރާތަކުން ހާމަކޮށްފައިވާ މައުލޫމާތުތަކަށް ބަލާލާއިރު މިހާތަނަށް އައިއިރު އިރާނުގެ 1230 މީހުން ވަނީ މިހަމަލާތަކުގައި މަރުވެފައެވެ. އޭގެތެރޭގައި ހަމަލާތައް ފެށުނު ދުވަހު އިރާނުގެ ސްކޫލަަކަށް ދިން ހަމަލާގައި މަރުވި 175 ކުޑަކުދިންވެސް ހިމެނެއެވެ. މީގެއިތުރުން މިއަދުވެސް އިސްރާއީލާ އެމެރިކާއިން ވަނީ އިރާނުގެ ދެ ސްކޫލަކަށް އަމާޒުކޮށް ހަމަލާދީފައެވެ.
އަނެއްކޮޅުން އިރާނުގެ ފޮރިން މިނިސްޓްރީގެ ސްޕޯކްސްމަން އިސްމާއީލު ބަގާއީ ވަނީ އެމެރިކާ އާއި އިސްރާއީލުން ގަސްތުގައި އިރާނުގެ ރައްޔިތުންނަށް އަމާޒުކޮށް ހަމަލާދެމުންދާކަމަށް ވިދާޅުވެފައެވެ. އެއްވެސް ވަރަކަށް ބެލުމެއް ނެތި އިރާނުގެ އާންމު ރައްޔިތުން ދިރިއުޅެމުންދާ ސަރަހައްދުތަކަށް އަމާޒުކޮށް ހަމަލާ ދެމުންދާކަމަށް ވިދާޅުވިއެވެ.