މި މައްސަލަ ހަގީގަތުގައި ގުޅިފައިވަނީ ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު މުހައްމަދު ސިނާން، މޯލްޑިވްސް އިސްލާމިކް ބޭންކް (އެމްއައިބީ) އިން ނެންގެވި 2.5 މިލިއަން ރުފިޔާގެ ލޯނަކާ ގުޅިގެން ސ. ހިތަދޫ މެޖިސްޓްރޭޓް ކޯޓުން ކުރި ހުކުމަކާއެވެ. އެ ކޯޓުން ސިނާންގެ ޣައިރު ހާޒިރުގައި ހުކުމްކޮށްފައިވަނީ ހަ މަސް ދުވަހުގެ ތެރޭގައި އެ ފައިސާ ދައްކައި ނިންމުމަށެވެ. ނަމަވެސް އެ ހުކުމުގައި ހަމައެކަނި މުއްދަތެއް ކަނޑައެޅުމުގެ އިތުރުން، ކޮންމެ މަހަކު ވެސް އެ މަހަކަށް ޖެހޭ މިންވަރަށް ވުރެ މަދު ނޫން އަދަދެއް ދައްކަމުން ދިއުމަށް ލާޒިމްކޮށްފައިވެއެވެ. އެހެންކަމުން، މިއީ ހަމައެކަނި ދަރަންޏެއް އޮތުމުގެ މައްސަލައެއް ނޫން ކަމަށާއި، މިއީ ކޯޓު ހުކުމެއް ތަންފީޒު ކުރުމުގައި ދެއްކި ފަރުވާކުޑަކަމުގެ މައްސަލައެއްގެ ގޮތުގައި ފާހަގަވެގެންދިޔައެވެ.
މައްސަލަ ސުޕްރީމް ކޯޓަށް!
މި މައްސަލަ ސުޕްރީމް ކޯޓާ ހަމައަށް ދިޔައީ، ކޯޓުން ކަނޑައެޅި ތަރުތީބުން ސިނާން ފައިސާ ދައްކަމުން ނުދާތީ، އާންމު ފަރާތެއް ކަމަށްވާ ޣާލިބް ސަލީމް އެ މައްސަލަ ހުށަހެޅުމާ ގުޅިގެންނެވެ. ސިނާންގެ ދިފާއުގައި ފާހަގަކުރި އެންމެ މުހިންމު ނުކުތާއަކީ، އޭނާގެ މައްޗަށް ދަށު ކޯޓުން ކުރި ހުކުމުގެ މަޢުލޫމާތު ލިބިފައިނުވާ ކަމަށާއި، އަދި ހުކުމުގައި ދީފައިވާ ހަ މަސް ދުވަހުގެ މުއްދަތު ހަމަވުމުގެ ކުރިން (ތިންވަނަ މަހުގެ ތެރޭގައި) ފައިސާ އެއްކޮށް ދައްކައި ނިންމާފައިވާ ކަމަށެވެ. ނަމަވެސް ސުޕްރީމް ކޯޓުން މި ދިފާއު ބަލައެއް ނުގަތެވެ. ފަނޑިޔާރު އައިޝާ ޝުޖޫން މުހައްމަދު ވިދާޅުވީ، ކޯޓުގެ ލިޔެކިޔުންތަކުން ސިނާނަށް ހުކުމް ކުރިކަން އެނގޭކަން ސާބިތުވާ ކަމަށާއި، އަދި ވަކީލަކު އައްޔަންކޮށްފައި ވަނިކޮށް ވަކީލު ތަނާޒުލްވުމަކީ ހުކުމް ނޭނގޭ ކަމަށް ބުނަން އޮތް އުޒުރެއް ނޫން ކަމަށެވެ.
ސުޕްރީމް ކޯޓުގައި ހުކުމް އިއްވަނީ
ގާނޫނީ ގޮތުން އެންމެ ބޮޑު ބަހުސަކަށް ވީ "ހަ މަސް ދުވަހުގެ ތެރޭގައި ފައިސާ ދެއްކުން" މި ޖުމްލަ މާނަކުރާނެ ގޮތަކާ މެދުގައެވެ. ސިނާން ގަބޫލުކުރެއްވި ގޮތުގައި ހަ މަސް ހަމަވުމުގެ ކުރިން ކޮންމެ ވަގުތަކު ފައިސާ ދެއްކިޔަސް ހުކުމާ އެއްގޮތް ވާނެއެވެ. ނަމަވެސް ސުޕްރީމް ކޯޓުން ކަނޑައެޅީ، ހުކުމުގައި "ކޮންމެ މަހަކު" ފައިސާ ދައްކަން އަންގާފައިވާ ނަމަ، އެއީ މަހުން މަހަށް އަދާކުރަންޖެހޭ އިލްތިޒާމެއް ކަމަށެވެ. ފުރަތަމަ ދެ މަހު އެއްވެސް ފައިސާއެއް ނުދައްކައި އޮތުމުން، ބޭންކުން ތަންފީޒީ މައްސަލަ ހުށަހެޅުމާއެކު، ސިނާން ވަނީ ހުކުމާ ޚިލާފުވެފައިވާ ކަމަށް ކޯޓުން ނިންމިއެވެ. ސުޕްރީމް ކޯޓަށް މައްސަލަ ހުށަހެޅި ދުވަހު ފައިސާ ދެއްކުމަކީ، އޭގެ ކުރިން ހިނގާފައިވާ ހުކުމާ ޚިލާފުވުމުގެ އަމަލު ބާތިލްވާނެ ކަމެއް ނޫން ކަމަށްވެސް ފަނޑިޔާރުން އިއްތިފާގުވިއެވެ.
މީގެ އިތުރުން، ލޯނަކީ ރަހުނު ހިމެނޭ ލޯނަކަށް ވުމުން ގޮނޑި ނުގެއްލޭނެ ކަމަށް ސިނާން ކުރި ދަޢުވާވެސް ކޯޓުން ބޭރުކޮށްލިއެވެ. ކޯޓުން ބުނީ، މެންބަރެއްގެ ޝަރުތު ހަމަވުމުގައި ބަލަނީ ކޯޓު ހުކުމަކާ އެއްގޮތަށް ދަރަނި އަދާކުރޭތޯ ކަމަށާއި، އެއީ ރަހުނު ހުރި ލޯނެއްތޯ ނުވަތަ ނޫންތޯ ބެލުމަކީ ގާނޫނުއަސާސީގެ 73 ވަނަ މާއްދާގެ ދަށުން ލާޒިމް ކަމެއް ނޫން ކަމަށެވެ. ކޯޓަކުން ދައްކަން އަންގާ ކޮންމެ ފައިސާއަކީ ވެސް އަދާކުރަންޖެހޭ ސާބިތު ދަރަންޏެއްގެ ގޮތުގައި ބެލެވޭނެ ކަމަށް ކުރީގެ ނިންމުންތަކަށް ރިއާޔަތްކޮށް ފަނޑިޔާރުން ކަނޑައެޅުއްވިއެވެ.
މި ހުރިހާ ނުކުތާތަކަށް ބަލައި، ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ކުރި ހުކުމަކީ، މުހައްމަދު ސިނާން ރައްޔިތުންގެ މަޖިލީހުގެ މެންބަރުކަމުގެ ޝަރުތު އުނިވެ، އޭނާގެ ގޮނޑި ގެއްލިފައިވާ ކަމަށެވެ. މި ނިންމުމާއެކު ހިތަދޫ އުތުރު ދާއިރާގެ ގޮނޑި ހުސްވެފައިވާކަން ރަސްމީކޮށް އިއުލާން ކުރެވުނެވެ. މިއީ ރާއްޖޭގެ ގާނޫނީ ތާރީޚުގައި، ކޯޓު ހުކުމަކާ އެއްގޮތަށް ދަރަނި އަދާކުރުމުގެ ތަރުތީބަށް އަމަލުނުކުރުމުގެ ސަބަބުން މެންބަރެއްގެ ގޮނޑި ގެއްލުނު މުހިންމު މައްސަލައެކެވެ.