އަލަށް އިންތިޚާބުވި ކައުންސިލުތަކުން ސަރުކާރުން ރައްޔިތުންނަށް ވެފައިވާ ވައުދު ފުއްދުމަށް ހުރަސް އަޅާކަމުގައިވާނަަމަ އެކަން ހާމަކުރަމުން ގެންދާނެކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
އއ. ރަސްދޫގައި ބޭއްވި ޕީއެންސީ ޖަލްސާގައި ވާހަކަދައްކަވަމުން އިދިކޮޅު މެމްބަރުން ހޮވުނު ކައުންސިލުތަކަށް ވަކިން ޚާއްސަކޮށް ސިޓީ ކައުންސިލުތަކަށް އަމާޒުކުރައްވާ ރައީސް ވިދާޅުވީ ސަރުކާރުން އިސްކުރާނީ ގައުމުކަމަށެވެ. ކޮންމެ ފިކުރެއްގެ ބަޔަކާއެކުވެސް ސަރުކާރުން މަސައްކަތްކުރާނެކަމަށާއި ސަރުކާރުގެ ކުރިމަތީގައި ހުރިހާ ރައްޔިތުން ހަމަހަމަވާނެކަމަށް ރައީސް ވިދާޅުވިއެވެ.
އެންމެ އާބާދީ ކުޑަ ރަށުގެ ރައްޔިތުންނާ އެންމެ ބޮޑު ސިޓީގެ ރައްޔިތުންނާއެކުވެސް އަމަލުކުރާނީ ހަމަހަމަކަމާއެކުކަމަށް ރައީސް ވިދާޅުވިއެވެ. ނަމަވެސް އެފުރުސަތު ސަރުކާރަށް ނުދޭނަމަ ވާގޮތް ރައްޔިތުންނަށް އޮޅުން ފިލުވައިދޭނެކަމަށް ރައީސް ވިދާޅުވިއެވެ.
ރައީސް ވިދާޅުވީ ރައްޔިތުންނަށް އެމަނިކުފާނު ވެވަޑައިގެންނެވި ވައުދު ފުއްދުމުގައި ކުރިޔަށްދާނެކަމަށެވެ. ރައީސް ވިދާޅުވީ މިސަރުކާރަކުން ގައުމާ އިދިކޮޅު ކަމެއް ނުކުރާނެކަމަށެވެ.